वैयक्तिक दुःख दूर सारत संसदेत सक्रिय राहणाऱ्या खासदार स्मिता वाघ यांना पुन्हा संसद रत्न सन्मान…
जळगाव समाचार | २५ मे २०२६
संसदेतील उल्लेखनीय कामगिरी करणाऱ्या लोकप्रतिनिधींना दिल्या जाणाऱ्या प्रतिष्ठित “संसद रत्न पुरस्कार २०२६” ची घोषणा करण्यात आली असून जळगाव लोकसभा मतदारसंघाच्या खासदार स्मिता उदय वाघ यांचा पुरस्कारार्थींमध्ये समावेश करण्यात आला आहे. विशेष म्हणजे सलग दुसऱ्या वर्षी त्यांना या पुरस्काराने गौरविण्यात येत आहे. संसदेतील सक्रिय सहभाग, लोकहिताचे प्रश्न प्रभावीपणे मांडणे आणि विकासकामांसाठी सातत्याने पाठपुरावा करणे या निकषांच्या आधारे त्यांची निवड करण्यात आल्याची माहिती समोर आली आहे.
कर्करोगासारख्या गंभीर आजाराशी सामना करत असतानाही स्मिता वाघ यांनी सार्वजनिक जीवनातील जबाबदाऱ्या अखंडपणे पार पाडल्या. उपचार सुरू असतानाही त्यांनी संसदेतील उपस्थिती, मतदारसंघातील संपर्क आणि विविध प्रश्नांवरील पाठपुरावा कायम ठेवला. प्रकृती अस्वस्थ असतानाही त्यांनी जनतेच्या समस्या जाणून घेत शासनापर्यंत पोहोचवण्याचे कार्य सुरू ठेवले. आरोग्याशी सुरू असलेल्या संघर्षासोबतच लोकसेवेचे कर्तव्य निभावत त्यांनी अनेकांसमोर जिद्द आणि कर्तव्यनिष्ठेचा आदर्श निर्माण केला आहे.
संसदेत त्यांनी जळगाव जिल्ह्याशी संबंधित पाणीप्रश्न, शेती, रोजगार, रेल्वे, विमानतळ, पायाभूत सुविधा, शिक्षण, आरोग्य आणि महिला सक्षमीकरण या विषयांवर सातत्याने आवाज उठवला. विविध विकासकामांसाठी केंद्र सरकारकडे पाठपुरावा करताना मतदारसंघाच्या गरजा प्रभावीपणे मांडल्या. तसेच महिलांच्या शिक्षण, स्वावलंबन आणि सुरक्षिततेसंदर्भात त्यांनी सातत्याने भूमिका घेत ग्रामीण भागातील महिलांमध्ये आत्मविश्वास निर्माण करण्याचे कार्य केले. गंभीर आजाराशी लढा देतानाही त्यांनी जनसेवा अबाधित ठेवली असल्याने अनेक महिला आणि रुग्णांसाठी त्या प्रेरणास्थान ठरत आहेत.
स्मिता वाघ यांनी २००२ ते २०१५ या कालावधीत जळगाव जिल्हा परिषद सदस्य म्हणून काम केले असून त्या जिल्हा परिषद अध्यक्षपदावरही कार्यरत होत्या. त्यानंतर २०१७ मध्ये त्या महाराष्ट्र विधान परिषदेच्या सदस्या झाल्या. २०२४ पासून त्या जळगाव लोकसभा मतदारसंघाचे प्रतिनिधित्व करत आहेत. त्यांच्या संसदीय कार्याची आणि सातत्यपूर्ण लोकसंपर्काची दखल घेत त्यांना पुन्हा एकदा “संसद रत्न” पुरस्कार जाहीर झाल्याने जळगाव जिल्ह्यातून त्यांचे अभिनंदन करण्यात येत आहे.
