जळगाव समाचार | ३१ मार्च २०२६
राज्यातील महायुती सरकारमध्ये सध्या काही मंत्र्यांच्या वक्तव्यांमुळे आणि कृतीमुळे वाद निर्माण झाले असून जनतेमध्ये चुकीचा संदेश गेल्याची चर्चा राजकीय वर्तुळात रंगली आहे. काही घटनांमुळे सरकारची प्रतिमा मलिन झाल्याचा आरोप होत असतानाच ‘चेकमेट’च्या राजकारणाचीही कुजबुज सुरू झाली आहे. याच पार्श्वभूमीवर राष्ट्रवादी काँग्रेसच्या काही मंत्र्यांची राजकीय घसरण झाल्यानंतर मित्रपक्षातील इतर मंत्रीही अधिक सावध भूमिका घेत असल्याचे चित्र दिसत आहे.
दरम्यान, उपमुख्यमंत्री Eknath Shinde हे स्वतःच्या पक्षातील काही मंत्र्यांवर नाराज असल्याची माहिती विश्वसनीय सूत्रांकडून समोर येत आहे. विशेषतः आमदार Deepak Kesarkar यांच्यासह आणखी एका मंत्र्याच्या कामगिरीबाबत शिंदे नाराज असल्याची चर्चा आहे. नाशिकमधील भोंदूबाबा अशोक खरात प्रकरणानंतर निर्माण झालेल्या वादामुळे आणि काही जिल्ह्यांमध्ये पक्षाची घटलेली ताकद यामुळे ही नाराजी वाढल्याचे सांगितले जात आहे.
नुकत्याच झालेल्या जिल्हा परिषद निवडणूक २०२६ मध्ये अपेक्षित यश न मिळाल्याने शिंदे यांनी काही मंत्र्यांच्या कार्यपद्धतीवर नाराजी व्यक्त केल्याची माहिती समोर आली आहे. याआधी लोकसभा आणि विधानसभा निवडणुकांमध्येही काही नेत्यांची कामगिरी समाधानकारक नसल्याचे निदर्शनास आले होते. काही ठिकाणी कॅमेऱ्यासमोर घडलेल्या वादग्रस्त घटनांमुळे पक्षाची प्रतिमा धोक्यात आल्याचेही आरोप करण्यात आले आहेत.
या सर्व पार्श्वभूमीवर राज्य मंत्रिमंडळात लवकरच मोठा फेरबदल होण्याची शक्यता वर्तवली जात आहे. सूत्रांच्या माहितीनुसार, काही मंत्र्यांना थेट मंत्रिमंडळातून वगळण्याऐवजी त्यांच्या खात्यांमध्ये बदल करून इशारा देण्याची भूमिका घेतली जाऊ शकते. कामगिरीत सातत्याने कमतरता असलेल्या मंत्र्यांवर कारवाई करताना त्यांना सुधारण्याची संधी देण्याचा प्रयत्न केला जाईल, अशी माहिती समोर येत असून लवकरच या घडामोडींना वेग येण्याची शक्यता आहे.
