जळगाव समाचार | १६ मे २०२६
जागतिक स्तरावरील भू-राजकीय अनिश्चितता, पॉलिमरच्या वाढत्या किमती आणि बाजारातील अस्थिरतेच्या पार्श्वभूमीवरही Jain Irrigation Systems Ltd. कंपनीने आर्थिक वर्ष २०२६ च्या चौथ्या तिमाहीत सकारात्मक आर्थिक कामगिरी नोंदवली आहे. कंपनीच्या ‘हाय-टेक’ आणि ‘अॅग्रो प्रोसेसिंग’ विभागांच्या चांगल्या कामगिरीमुळे एकत्रित महसुलात वार्षिक तुलनेत ४.३ टक्के वाढ झाली असल्याची माहिती कंपनीकडून देण्यात आली.
कंपनीने चौथ्या तिमाहीत २३३ कोटी रुपयांची रोख निर्मिती केली असून ती EBITDA च्या सुमारे ९७ टक्के इतकी असल्याचे सांगण्यात आले. तसेच संपूर्ण आर्थिक वर्ष २०२६ मध्ये कंपनीचा एकत्रित EBITDA ८०९ कोटी रुपये राहिला असून, तो मागील वर्षाच्या तुलनेत १२.८ टक्क्यांनी अधिक आहे. खेळते भांडवल व्यवस्थापन सुधारल्यामुळे कंपनीला वर्षभरात ६१९ कोटी रुपयांचा रोख प्रवाह निर्माण करण्यात यश आले आहे.
जैन हिल्स येथे झालेल्या संचालक मंडळाच्या बैठकीनंतर निकाल जाहीर करण्यात आले. कंपनीचे उपाध्यक्ष व व्यवस्थापकीय संचालक अनिल जैन यांनी सांगितले की, बदलत्या जागतिक परिस्थितीवर कंपनी लक्ष ठेवून असून भविष्यात महसूल वाढ, प्रकल्पांतील येणी वसुली सुधारणा आणि शाश्वत मुक्त रोख प्रवाह निर्माण करण्यावर विशेष भर दिला जाणार आहे.
