जळगाव समाचार | १२ मे २०२६
देशातील वैद्यकीय शिक्षणासाठी प्रवेशाची सर्वात महत्त्वाची मानली जाणारी ‘नीट’ (NEET) परीक्षा पुन्हा एकदा पेपरफुटीच्या गंभीर आरोपांमुळे वादाच्या केंद्रस्थानी आली आहे. राष्ट्रीय परीक्षा संस्था (NTA) कडून परीक्षा रद्द करण्याचा निर्णय घेण्यात आल्यानंतर देशभरातील सुमारे १० लाख विद्यार्थ्यांना पुन्हा परीक्षेला सामोरे जावे लागणार आहे. या घडामोडीमुळे विद्यार्थी, पालक आणि शैक्षणिक क्षेत्रात तीव्र नाराजी व्यक्त होत आहे.
३ मे रोजी घेण्यात आलेल्या या परीक्षेची प्रश्नपत्रिका परीक्षेपूर्वीच काही गटांपर्यंत पोहोचल्याची माहिती समोर आल्यानंतर संपूर्ण प्रक्रियेच्या विश्वासार्हतेवर प्रश्नचिन्ह निर्माण झाले. प्राथमिक तपासात प्रश्नपत्रिका सोशल मीडियाच्या माध्यमातून प्रसारित झाल्याचे समोर आले असून, परीक्षा सुरू होण्याच्या तब्बल ४२ तास आधी पेपर काही जणांकडे उपलब्ध असल्याचा संशय तपास यंत्रणांनी व्यक्त केला आहे.
या प्रकरणातील महत्त्वाचा धागा नाशिकपर्यंत पोहोचला असून, नाशिकच्या इंदिरानगर परिसरातून एका संशयिताला राजस्थान सीबीआय आणि नाशिक गुन्हे शाखेच्या संयुक्त कारवाईत ताब्यात घेण्यात आले आहे. तपास यंत्रणांच्या माहितीनुसार, नाशिकमधून बाहेर पडलेली प्रश्नपत्रिका हरियाणात पोहोचविण्यात आली आणि तेथे तिचे अनेक संच तयार करून देशातील विविध राज्यांत प्रसारित करण्यात आल्याचा संशय आहे.
हरियाणा, बिहार, राजस्थान, उत्तर प्रदेश, जम्मू-काश्मीर, आंध्र प्रदेश, केरळ आणि तामिळनाडूसह विविध राज्यांमध्ये या पेपरफुटीचे जाळे पोहोचल्याचे तपासातून समोर येत आहे. काही तासांत एका राज्यातून दुसऱ्या राज्यात प्रश्नपत्रिका पोहोचल्याने यामागे संघटित आणि तांत्रिकदृष्ट्या सक्षम रॅकेट कार्यरत असल्याची शक्यता व्यक्त केली जात आहे.
या संपूर्ण प्रकारामुळे लाखो विद्यार्थ्यांच्या मेहनतीवर पाणी फिरल्याची भावना व्यक्त होत आहे. वर्षानुवर्षे अभ्यास करून स्पर्धा परीक्षेची तयारी करणाऱ्या विद्यार्थ्यांना पुन्हा मानसिक ताण आणि अनिश्चिततेला सामोरे जावे लागत आहे. परीक्षा व्यवस्थेतील सुरक्षेतील त्रुटी, प्रश्नपत्रिकांच्या गोपनीयतेचे अपयश आणि जबाबदार यंत्रणांची कार्यपद्धती यावरही प्रश्न उपस्थित होत आहेत.
या प्रकरणाचा तपास आता केंद्रीय अन्वेषण विभाग (CBI) आणि विविध राज्यांच्या तपास यंत्रणांकडून संयुक्तपणे केला जात असून, या रॅकेटमागील सूत्रधारांपर्यंत पोहोचण्याचे आव्हान यंत्रणांसमोर आहे. दोषींवर कठोर कारवाईची मागणी देशभरातून होत असून, परीक्षा प्रक्रियेवरील विश्वास पुन्हा निर्माण करण्यासाठी सरकारकडून ठोस आणि कठोर निर्णय अपेक्षित असल्याची भावना व्यक्त केली जात आहे.
दरम्यान, एनटीएकडून नव्या परीक्षेची तारीख, प्रवेशपत्रे आणि पुढील प्रक्रियेबाबत अधिकृत माहिती लवकरच जाहीर केली जाणार असल्याचे सांगण्यात आले आहे. अफवांवर विश्वास न ठेवता अधिकृत संकेतस्थळावरील माहितीलाच प्राधान्य द्यावे, असे आवाहन विद्यार्थ्यांना करण्यात आले आहे.
