जळगाव समाचार | २० ऑगस्ट २०२६
जळगाव शहर महानगरपालिकेच्या प्रभाग क्रमांक ७ मधील शिव कॉलनी ते रेल्वे लाईन दरम्यानच्या प्रलंबित समांतर रस्त्याचे काम सार्वजनिक बांधकाम विभागाच्या वतीने नुकतेच पूर्ण करण्यात आले आहे. नवनिर्मित रस्त्याच्या कामाची गुणवत्ता तपासण्यासाठी शहराच्या महापौर तथा प्रभाग ७ च्या नगरसेविका दीपमाला काळे यांनी गुरुवारी (२० ऑगस्ट) सायंकाळी प्रत्यक्ष पाहणी केली.
या पाहणी दरम्यान स्थायी समिती सदस्य विशाल भोळे, जिल्हा परिषदेच्या माजी सदस्य माधुरी अत्तरदे, नगरसेविका अंकिता पंकज पाटील, सार्वजनिक बांधकाम विभागाचे अधिकारी श्री.देवरे हे प्रामुख्याने उपस्थित होते. शिव कॉलनी परिसरातील वाहतुकीची कोंडी लक्षात घेता या समांतर रस्त्याची नागरिकांकडून अनेक दिवसांपासून मागणी होत होती. रस्त्याचे काम दर्जेदार आणि वेळेत पूर्ण झाल्यामुळे परिसरातील नागरिकांनी महापौर दीपमाला काळे व उपस्थित नगरसेवकांचे आभार मानले.
या प्रसंगी बोलताना महापौर दीपमाला काळे म्हणाल्या, “नागरिकांची गैरसोय दूर करणे आणि शहराचा विकास हेच आमचे मुख्य ध्येय आहे. या समांतर रस्त्यामुळे या परिसरातील वाहतूक अत्यंत सुटसुटीत होणार असून वाहनधारकांना मोठा दिलासा मिळणार आहे.”
समांतर रस्त्याचे काम पूर्ण झाल्याने शिव कॉलनी व परिसरातील रहिवाशांनी आनंद व्यक्त केला असून प्रशासनाच्या या तत्पर कामाबद्दल समाधान व्यक्त केले आहे.या वेळी पंकज पाटील, चेतन तिवारी, ऋषिकेश शिंपी, कमलाकर झांबरे, बाळासाहेब चौधरी, सुमेरसिंग राजपूत, सुनील महाजन, पराग चौधरी, ऋषी राजपूत, सुधाकर सोनवणे, मनोज जावळे, चेतना चौधरी, ज्योती महाजन, शारदा चौधरी, काजल महाजन, ललिता जावळे आदी नागरिक उपस्थित होते.
