जळगाव समाचार | ११ एप्रिल २०२६
चित्रपटसृष्टीतील ज्येष्ठ आणि दिग्गज पार्श्वगायिका आशा भोसले यांना ११ एप्रिल रोजी हृदयविकाराचा झटका आल्याची धक्कादायक माहिती समोर आली आहे. प्रकृती अस्वस्थ झाल्यानंतर त्यांना तातडीने मुंबईतील ब्रीच कँडी रुग्णालय येथे दाखल करण्यात आले असून सध्या आपत्कालीन वैद्यकीय विभागात त्यांच्यावर उपचार सुरू आहेत. रुग्णालय प्रशासनाने त्यांच्या दाखल होण्याची आणि उपचार सुरू असल्याची पुष्टी केली आहे, मात्र प्रकृतीबाबत अधिकृत तपशील अद्याप जाहीर करण्यात आलेला नाही.
या घटनेची माहिती समोर आल्यानंतर चाहत्यांमध्ये तसेच चित्रपटसृष्टीत चिंता व्यक्त होत आहे. आशा भोसले यांच्या प्रकृतीविषयी जाणून घेण्यासाठी माध्यम प्रतिनिधी आणि छायाचित्रकार रुग्णालयाबाहेर मोठ्या संख्येने उपस्थित आहेत. मात्र त्यांच्या कुटुंबीयांकडून कोणतीही अधिकृत प्रतिक्रिया किंवा सविस्तर माहिती देण्यात आलेली नाही. त्यामुळे त्यांच्या प्रकृतीबाबतची अनिश्चितता कायम असून चाहत्यांकडून त्यांच्या लवकर बरे होण्यासाठी प्रार्थना केल्या जात आहेत.
१९४८ साली ‘सावन आया’ या गीतातून कारकिर्दीची सुरुवात करणाऱ्या आशा भोसले यांनी आतापर्यंत सुमारे १६ हजारांहून अधिक गाणी विविध भाषांमध्ये सादर केली आहेत. हिंदीसह मराठी, बंगाली, गुजराती, पंजाबी, तमिळ, मल्याळम, इंग्रजी आणि रशियन भाषांमध्ये त्यांनी आपल्या आवाजाची अमिट छाप पाडली आहे. दिग्गज संगीतकार राहुल देव बर्मन यांच्याशी विवाहबद्ध झालेल्या आशा भोसले यांनी सुमारे २२०० हून अधिक चित्रपटांसाठी गायन केले असून २००८ मध्ये त्यांना पद्मविभूषण पुरस्काराने गौरविण्यात आले आहे. त्यांच्या दीर्घ आणि यशस्वी कारकिर्दीमुळे त्या भारतीय संगीतविश्वातील अत्यंत मानाचे स्थान राखून आहेत.
