जळगाव समाचार | १० एप्रिल २०२५
जळगाव तालुक्यातील वावडदा फाट्याजवळ गुरुवारी (१० एप्रिल) दुपारी सुमारे १ वाजता एक भीषण अपघात झाला. दुचाकीवरून जात असलेल्या तिघांना समोरून येणाऱ्या पिकअप वाहनाने जोरदार धडक दिली. या अपघातात दोन जणांचा जागीच मृत्यू झाला असून एकजण गंभीर जखमी झाला आहे.
या अपघातात मृत्यू झालेल्यांची नावे भावेश गोरख पाटील (वय ३५) आणि महेंद्र वसंत जाधव (वय ३८, दोघेही रा. पाथरी, ता. जळगाव) अशी आहेत. तर संदीप शांताराम भील (वय ३५) हा गंभीर जखमी झाला असून त्याच्यावर जिल्हा शासकीय वैद्यकीय महाविद्यालयात उपचार सुरू आहेत.
घटनास्थळी मोठी गर्दी झाली होती. जखमीला तातडीने रुग्णालयात दाखल करण्यात आले. दरम्यान, अपघाताची माहिती मिळताच नातेवाईकांनी जिल्हा रुग्णालयात धाव घेत एकच आक्रोश केला.
या घटनेमुळे परिसरात हळहळ व्यक्त केली जात आहे. पुढील तपास पोलिसांकडून सुरू आहे.
