जळगाव समाचार डेस्क। २२ ऑगस्ट २०२४
सावखेडा सिम प्राथमिक आरोग्य केंद्र, यावल येथे शिपाई पदावर कार्यरत असलेल्या एका कर्मचाऱ्याची रावेर पंचायत समिती येथे स्थापत्य अभियांत्रिकी सहाय्यक या पदावर बदली करण्यात आली होती. या कर्मचाऱ्याला कार्यमुक्त करण्यासाठी जळगाव जिल्हा परिषदेतील सामान्य प्रशासन विभागातील वरिष्ठ लिपिक नरेंद्र किशोर खाचणे (वय ५२) यांनी २ लाख रुपयांची लाच मागितली होती. तक्रारदाराने या लाच मागणीबाबत लाचलुचपत प्रतिबंधक विभाग, जळगाव येथे २१ ऑगस्ट रोजी तक्रार दाखल केली होती. या तक्रारीनुसार लाचलुचपत विभागाने पडताळणी केली. यामध्ये खाचणे यांनी तडजोडीनंतर १ लाख ८० हजार रुपयांची लाच स्वीकारली. या दरम्यान, लाचलुचपत विभागाच्या पथकाने त्यांना रंगेहात अटक केली.
खाचणे यांच्या विरोधात शनिपेठ पोलीस स्टेशन, जळगाव येथे गुन्हा दाखल करण्यात आला आहे. या कारवाईमध्ये पोलीस नाईक बाळू मराठे, पो.ना. सुनिल वानखेडे, पोकॉ. राकेश दुसाणे, पोकॉ. प्रणेश ठाकुर, उपनिरीक्षक दिनेशसिंग पाटील, सुरेश पाटील, पो.ह. रविंद्र घुगे, म.पो.हे.कॉ. शैला धनगर, पोना किशोर महाजन, पो.कॉ. प्रदीप पोळ, पो.कॉ. सचिन चाटे आणि अमोल सूर्यवंशी यांच्या पथकाने सहभाग घेतला.
