जळगाव समाचार | १३ नोव्हेंबर २०२६
राजकीय जबाबदाऱ्यांच्या पलीकडे जाऊन सामाजिक आणि कौटुंबिक नाती जपण्याचा उपक्रम चाळीसगाव तालुक्यात पाहायला मिळत आहे. आमदार मंगेश चव्हाण यांनी तालुक्यातील १ हजार ५०० हून अधिक आशा वर्कर, अंगणवाडी सेविका आणि मदतनीस महिलांशी भाऊबीजेच्या निमित्ताने गेल्या अनेक वर्षांपासून आपुलकीचे नाते जपले आहे. दरवर्षी भाऊबीजेला या महिलांना साडी भेट देऊन त्यांचा सन्मान करण्याची परंपरा त्यांनी सुरू ठेवली आहे. नुकत्याच लोजे आंबेहोळ येथे झालेल्या भाऊबीज सोहळ्यात या नात्याचा कौटुंबिक पैलू पुन्हा समोर आला. या भेटीदरम्यान आमदार चव्हाण यांनी आशा वर्कर कमलताई अनिल पवार यांच्या घरी जाऊन भोजनाचा आस्वाद घेतला. लोकप्रतिनिधी म्हणून नव्हे, तर भाऊ म्हणून त्यांनी स्वीकारलेल्या या पाहुणचाराची गावात चर्चा झाली.
तालुक्यातील विविध गावांमध्ये विकासकामे आणि सामाजिक कार्यक्रमांच्या निमित्ताने भेट देताना आशा वर्कर, अंगणवाडी सेविका आणि मदतनीस त्यांचे आपुलकीने स्वागत करतात. भाऊबीज हा केवळ औपचारिक कार्यक्रम न ठेवता वर्षभर एकमेकांच्या संपर्कात राहून हे नाते जपले जात असल्याचे चित्र आहे. लोजे आंबेहोळ येथील कार्यक्रमात अंगणवाडी सेविका संगीताबाई राठोड, भारती पाटील, आशा वर्कर अनिता राठोड, मदतनीस सुनिता पाटील आणि सरपंच वैशाली संदीप राठोड यांच्यासह गावातील अन्य महिला उपस्थित होत्या. यावेळी सर्वांनी आमदार चव्हाण यांचे स्वागत केले.
या नात्याविषयी बोलताना आमदार मंगेश चव्हाण म्हणाले, की आशा वर्कर, अंगणवाडी सेविका आणि मदतनीस या केवळ शासकीय यंत्रणेतील कर्मचारी नसून आपल्या हक्काच्या बहिणी आहेत. दरवर्षी साडी भेट देताना त्यांच्या चेहऱ्यावरील आनंद महत्त्वाचा असतो; मात्र त्यांच्याकडून मिळणारे प्रेम, माया आणि आशीर्वाद हे कोणत्याही भेटवस्तूपेक्षा मोठे आहेत. तालुक्यातील कोणत्याही गावात गेल्यानंतर आपली बहीण आपली वाट पाहत असते, हीच आयुष्यातील खरी कमाई असल्याची भावना त्यांनी व्यक्त केली. ग्रामीण भागातील आरोग्यसेवा, माता-बालसंगोपन आणि जनजागृतीमध्ये महत्त्वाची भूमिका बजावणाऱ्या महिलांप्रती कृतज्ञता व्यक्त करण्याचा हा उपक्रम असल्याचेही त्यांनी सांगितले. भाऊबीजेच्या निमित्ताने दिली जाणारी साडी ही भेटवस्तू न राहता या महिला आणि आमदार यांच्यातील जिव्हाळ्याच्या नात्याचे प्रतीक बनली आहे.
