जळगाव समाचार | ८ ऑगस्ट २०२६
पेट्रोलमध्ये २० टक्के इथेनॉल मिश्रणाच्या E20 धोरणावरून केंद्र सरकार आणि काँग्रेसमध्ये पुन्हा एकदा राजकीय वाद पेटला आहे. लोकसभेतील विरोधी पक्षनेते आणि काँग्रेस खासदार राहुल गांधी यांनी सोशल मीडियावर व्हिडीओ शेअर करत केंद्र सरकारच्या E20 पेट्रोल धोरणावर जोरदार टीका केली. “दाल में कुछ काला नहीं, बल्कि पूरी दाल ही काली है,” असे म्हणत त्यांनी या धोरणाच्या अंमलबजावणीवर प्रश्नचिन्ह उपस्थित केले. E20 पेट्रोलमुळे वाहनांच्या इंजिनवर परिणाम होत असून मायलेज कमी होत असल्याचा दावा त्यांनी केला आहे.
राहुल गांधी यांनी शेअर केलेल्या व्हिडीओमध्ये एका कारच्या पेट्रोल टाकीजवळ उभे राहून E20 पेट्रोलच्या मुद्द्यावर भाष्य केले. E20 हा केवळ छोटा विषय नसून देशातील सर्वसामान्य नागरिकांशी संबंधित मोठा प्रश्न असल्याचे त्यांनी म्हटले. पेट्रोलमध्ये इथेनॉलचे मिश्रण केल्यामुळे जुन्या वाहनांच्या इंजिनवर परिणाम होतो, वाहनांचे मायलेज कमी होते आणि त्याचा अतिरिक्त आर्थिक भार वाहनधारकांच्या खिशावर पडत असल्याचा आरोप राहुल गांधी यांनी केला. सरकारच्या या धोरणामुळे सामान्य नागरिकांना नेमका काय फायदा होत आहे, याचे स्पष्ट उत्तर मिळणे आवश्यक असल्याचेही त्यांनी म्हटले.
देशात भ्रष्टाचाराशी संबंधित अनेक प्रश्न असल्याचा आरोप करत राहुल गांधी यांनी E20 पेट्रोलचा मुद्दा काँग्रेसकडून लावून धरला जाणार असल्याचे सांगितले. या प्रश्नावर सरकारला घेरण्याचा इशाराही त्यांनी दिला. त्यांच्या या टीकेनंतर केंद्रीय पेट्रोलियम आणि नैसर्गिक वायू मंत्री हरदीप सिंह पुरी यांनी विरोधकांवर पलटवार केला. भारताचा जैवइंधन मिश्रण कार्यक्रम नियोजित पद्धतीने आणि यशस्वीपणे पुढे जात असून काही जण विनाकारण या विषयाला वादाचे स्वरूप देत असल्याचे पुरी यांनी म्हटले.
हरदीप सिंह पुरी यांनी पेट्रोलच्या गुणवत्तेबाबतच्या आरोपांवर आकडेवारीचा दाखला देत स्पष्टीकरण दिले. देशभरात दररोज सुमारे सहा ते सात कोटी ग्राहक पेट्रोल पंपांवर इंधन भरतात. इंधनात भेसळ किंवा गुणवत्तेची समस्या असल्यास ती मोठ्या प्रमाणावर आढळली असती, असा दावा त्यांनी केला. सरकारने देशभरातील एक लाख सात हजारांहून अधिक पेट्रोल पंपांमधून नमुने तपासले असून त्यापैकी केवळ चार ठिकाणी समस्या आढळल्याचे त्यांनी सांगितले. त्यामुळे काही मोजक्या प्रकरणांच्या आधारे संपूर्ण E20 कार्यक्रमावर प्रश्नचिन्ह उपस्थित करणे योग्य नसल्याचे पुरी यांनी स्पष्ट केले.
दरम्यान, प्रदूषण कमी करणे आणि कच्च्या तेलाच्या आयातीवरील भारताचे अवलंबित्व कमी करणे हा E20 धोरणामागील केंद्र सरकारचा प्रमुख उद्देश आहे. पेट्रोलमध्ये २० टक्क्यांपर्यंत इथेनॉल मिसळण्याच्या या धोरणाला E20 पेट्रोल म्हटले जाते. मात्र, जुन्या वाहनांमध्ये त्याचा परिणाम, इंधन कार्यक्षमता आणि मायलेज याबाबत वाहनधारकांकडून प्रश्न उपस्थित केले जात आहेत. त्यामुळे E20 पेट्रोलचा मुद्दा आता केवळ इंधन धोरणापुरता मर्यादित न राहता केंद्र सरकार आणि विरोधकांमधील राजकीय संघर्षाचा विषय बनला आहे.
