जळगाव समाचार | १३ जुलै २०२६
थायलंडची राजधानी बँकॉकच्या उत्तर भागातील ‘ना लाडप्राओ’ (Na Lat Phrao) या पबमध्ये सोमवारी पहाटे भीषण आग लागून किमान २७ जणांचा मृत्यू झाला, तर ६३ जण जखमी झाल्याची माहिती समोर आली आहे. जखमींपैकी २२ जणांची प्रकृती अत्यंत चिंताजनक असून त्यांच्यावर विविध रुग्णालयांत उपचार सुरू आहेत. मध्यरात्रीच्या सुमारास ही दुर्घटना घडली. आग लागल्याची माहिती मिळताच अग्निशामक दल, बचाव पथके आणि वैद्यकीय यंत्रणा तातडीने घटनास्थळी दाखल झाली. असोसिएटेड प्रेस (AP)च्या वृत्तानुसार, पबच्या मुख्य प्रवेशद्वारातून आगीच्या प्रचंड ज्वाळा आणि धुराचे लोट बाहेर पडत असल्याने उपस्थितांमध्ये एकच गोंधळ उडाला आणि अनेकांनी जीव वाचवण्यासाठी धावाधाव केली.
घटनास्थळी भेट दिल्यानंतर थायलंडचे पंतप्रधान अनुतिन चार्नविराकुल यांनी २७ जणांच्या मृत्यूला दुजोरा देत आगीच्या कारणांचा सखोल तपास सुरू असल्याचे सांगितले. प्राथमिक माहितीनुसार, कार्यक्रमादरम्यान स्टेजजवळील सर्किट ब्रेकरमधून धूर निघताना एका संगीतकाराने पाहिले होते. त्यानंतर काही क्षणांतच स्फोट झाल्याने संपूर्ण इमारतीत दाट धूर पसरला. धुरापासून बचाव करण्यासाठी काहीजण पबच्या मागील बाजूस असलेल्या स्वच्छतागृहात लपले; मात्र गुदमरल्याने त्यांचा मृत्यू झाला. त्यामुळे अनेक मृतदेह स्वच्छतागृहांमध्ये आढळून आल्याची माहिती पंतप्रधानांनी दिली.
बँकॉकचे गव्हर्नर चडचार्ट सित्तीपुंट यांनी सांगितले की, जखमींना तातडीने विविध रुग्णालयांत दाखल करण्यात आले असून अनेकांची प्रकृती गंभीर आहे. मृतांची ओळख पटविण्याचे काम युद्धपातळीवर सुरू असून काही पीडितांकडे ओळखपत्र नसल्याने तसेच काही जण बेशुद्ध अवस्थेत सापडल्याने या प्रक्रियेत अडचणी येत आहेत. अग्निशामक दलाने सुमारे पाऊण तासाच्या प्रयत्नांनंतर आगीवर नियंत्रण मिळवले. मात्र, पबमधील फर्निचर, आतील सजावट आणि संपूर्ण अंतर्गत भाग मोठ्या प्रमाणात जळून खाक झाला आहे. बेपत्ता नातेवाईकांचा शोध घेण्यासाठी घटनास्थळी विशेष नोंदणी केंद्रही सुरू करण्यात आले आहे.
दरम्यान, गायिका वाँगवाँगवाई यांनी असोसिएटेड प्रेसशी बोलताना आग लागली तेव्हा तिच्या बँडमधील कलाकार पबमध्ये सादरीकरण करत असल्याचे सांगितले. या दुर्घटनेत तिच्या एका सहकलाकाराचा मृत्यू झाला असून तिघांवर उपचार सुरू आहेत, तर आणखी एक जण अद्याप बेपत्ता आहे. आग लागताच संपूर्ण पब अंधारात बुडाला आणि दाट धुरामुळे एकमेकांचा शोध घेणेही अशक्य झाल्याचे त्यांनी सांगितले. थायलंडमध्ये अशा प्रकारची ही पहिली दुर्घटना नसून, २०२२ मध्ये देशाच्या पूर्व भागातील एका म्युझिक पबमधील आगीत १४ जणांचा मृत्यू झाला होता. तसेच २००९ मध्ये बँकॉकच्या ‘शांतिका’ नाईट क्लबमध्ये नववर्ष स्वागत समारंभादरम्यान लागलेल्या आगीत ६६ जणांचा मृत्यू आणि २०० हून अधिक जण जखमी झाले होते.
