जळगाव समाचार | २९ सप्टेंबर २०२५
जळगाव तालुक्यातील ममुराबाद शिवारातील माजी महापौर ललित कोल्हे यांच्या मालकीच्या एल.के. फॉर्म हाऊस येथे सुरू असलेल्या बोगस कॉल सेंटरवर पोलिसांनी रविवारी (२८ सप्टेंबर) दुपारी १२ वाजता छापा टाकून मोठा पर्दाफाश केला. या कॉल सेंटरच्या माध्यमातून अमेरिकन आणि कॅनेडियन नागरिकांना ॲमेझॉन कस्टमर केअर असल्याचे भासवून लाखो रुपयांची फसवणूक केली जात असल्याची गोपनीय माहिती पोलिस अधीक्षक अशोक नखाते यांना मिळाल्यानंतर ही कारवाई करण्यात आली. छाप्यात पोलिसांनी ३१ लॅपटॉप, सात मोबाईल, डेबिट कार्ड, फ्रिज तसेच दोन हुक्का सेट जप्त केले.
या प्रकरणी पोलिस उपनिरीक्षक मुस्तफा बेग हिसाबेक मिर्झा यांच्या फिर्यादीवरून राकेश चंदू आगारिया (रा. वाघ नगर, जळगाव), ललित कोल्हे (रा. कोल्हे नगर, जळगाव), नरेंद्र चंदू आगारिया (रा. वाघ नगर, जळगाव), आदिल सैय्यद निशास अहमद सैय्यद (रा. मालाड, मुंबई), इम्रान अकबर खान (रा. कांदीवली, मुंबई), तसेच अकबर (पूर्ण नाव अज्ञात), ऋषी (पूर्ण नाव अज्ञात), मोहम्मद जिशान नुरी मोहम्मद नुर आलम (वय १९, रा. हावडा, पश्चिम बंगाल), शाहबाज आलम मोहम्मद शाहबउद्दीन (वय २५, रा. हावडा, पश्चिम बंगाल), साकीब आलम शहाबउद्दीन (वय १९, रा. हावडा, पश्चिम बंगाल) आणि मोहम्मद हाशिर मोहम्मद राशिद (वय १९, रा. हावडा, पश्चिम बंगाल) अशा एकूण ११ जणांविरोधात गुन्हा दाखल करण्यात आला आहे.
अटक करण्यात आलेल्या सात जणांना सोमवारी (२९ सप्टेंबर) दुपारी ४ वाजता जळगाव जिल्हा व सत्र न्यायालयात हजर करण्यात आले. सुनावणीनंतर न्यायालयाने सर्वांना पाच दिवसांची पोलिस कोठडी सुनावली आहे. या कारवाईमुळे जिल्ह्यात मोठी खळबळ उडाली असून प्रकरणाचा पुढील तपास सायबर पोलीस ठाण्याच्या पथकाकडून सुरू आहे.
