जळगाव समाचार | १७ डिसेंबर २०२५
भडगाव शहरात मंगळवार, दि. 16 डिसेंबर 2025 रोजी घडलेल्या अत्यंत दुर्दैवी घटनेने संपूर्ण शहर हादरून गेले आहे. आदर्श इंग्लिश मीडियम स्कूल, कोठली रोड, भडगाव येथील गंभीर निष्काळजीपणामुळे अवघ्या चार वर्षांच्या दोन विद्यार्थ्यांचा शाळेच्या परिसरातील उघड्या नाल्यात बुडून मृत्यू झाला. या घटनेमुळे शाळेतील सुरक्षिततेबाबत गंभीर प्रश्न निर्माण झाले असून, पालकवर्गात तीव्र संताप व्यक्त केला जात आहे.
या प्रकरणी भडगाव पोलीस स्टेशनमध्ये FIR क्र. 0463/2025 नुसार भारतीय न्याय संहिता (BNS) 2023 चे कलम 105 व 106 अंतर्गत शाळेचे संस्थाचालक, संचालक, प्राचार्य तसेच संबंधित वर्गशिक्षकांविरोधात गुन्हा दाखल करण्यात आला आहे. लहान मुलांच्या सुरक्षिततेसाठी आवश्यक खबरदारी न घेतल्यानेच ही दुर्घटना घडल्याचा ठपका पोलिसांनी ठेवला आहे. पुढील तपास पोलीस उपनिरीक्षक सुशील राजेंद्र सोनवणे करीत असून, दोषी आढळणाऱ्यांवर कठोर कारवाई केली जाईल, असे पोलिसांनी स्पष्ट केले आहे.
मृत मुलांची ओळख मयंक उर्फ संकेत ज्ञानेश्वर वाघ (वय 4, रा. आदर्श कॉलनी, भडगाव) आणि अंश सागर तहसीलदार (वय 4, रा. बालाजी गल्ली, भडगाव) अशी आहे. दोघेही आदर्श इंग्लिश मीडियम स्कूलमध्ये ज्युनियर के.जी.मध्ये शिक्षण घेत होते. फिर्यादी ज्ञानेश्वर रामदास वाघ हे कामानिमित्त गावाबाहेर असताना सकाळी सुमारे 10 वाजता शाळेतून दोन मुले बेपत्ता असल्याची माहिती त्यांना फोनद्वारे मिळाली. शोध घेतला असता शाळेच्या शौचालयालगत असलेल्या पाण्याने भरलेल्या उघड्या नाल्यात ही दोन्ही मुले पडलेली आढळून आली. त्यांना तात्काळ ग्रामीण रुग्णालय, भडगाव येथे नेण्यात आले; मात्र डॉक्टरांनी तपासणीनंतर दोघांनाही मृत घोषित केले.
घटनास्थळी पाहणी केल्यानंतर अनेक धक्कादायक बाबी समोर आल्या आहेत. लहान मुलांच्या शौचालयालगतची संरक्षक भिंत तुटलेली होती, शौचालयाच्या अगदी बाजूलाच खोल आणि उघडा नाला वाहत होता, तसेच शाळा सुरू असताना मुलांवर कोणतीही प्रभावी देखरेख नसल्याचे निदर्शनास आले. या घटनेनंतर भडगाव शहरात शोककळा पसरली असून, दोन कुटुंबांवर दुःखाचा डोंगर कोसळला आहे. भविष्यात अशा घटना घडू नयेत यासाठी शाळा व्यवस्थापन, प्रशासन आणि समाजाने एकत्रितपणे जबाबदारी घेण्याची मागणी नागरिकांकडून केली जात आहे.
