जळगाव समाचार | २५ डिसेंबर २०२५
जळगाव जिल्ह्यात वाढते रस्ते अपघात, वाहतूक नियमांचे उल्लंघन आणि गुन्हेगारी कृत्यांना आळा घालण्यासाठी जळगाव जिल्हा पोलीस दलातर्फे दि. २४ डिसेंबर २०२५ रोजी संपूर्ण जिल्ह्यात ‘विशेष वाहन चेकिंग मोहीम’ राबविण्यात आली. पोलीस अधीक्षक डॉ. महेश्वर रेड्डी यांच्या निर्देशानुसार सर्व पोलीस ठाणे व वाहतूक शाखांना कडक नाकाबंदी करून वाहनांची कसून तपासणी करण्याचे आदेश देण्यात आले होते. त्यानुसार जिल्हाभरात एकाच वेळी व्यापक स्वरूपात ही कारवाई करण्यात आली.
या विशेष मोहिमेत एकूण ११०६ वाहनांवर कारवाई करत १३ लाख ७१ हजार ४५० रुपयांचा दंड वसूल करण्यात आला. यामध्ये विना नंबर प्लेट अथवा फॅन्सी नंबर प्लेट असलेल्या ४६३ वाहनांवर कारवाई करून ४ लाख ४५ हजार रुपयांचा दंड वसूल करण्यात आला. तसेच वाहतूक नियमांचे उल्लंघन करत वाहन चालवणाऱ्या १०७ अल्पवयीन चालकांवर कारवाई करून ४ लाख ४ हजार ५०० रुपयांचा दंड आकारण्यात आला. याबाबत पालकांनी अल्पवयीन मुलांच्या हाती वाहन देऊ नये, असे आवाहन पोलीस दलातर्फे करण्यात आले आहे.
याशिवाय इतर मोटार वाहन कायद्याच्या उल्लंघनांप्रकरणी ५३६ वाहनांवर कारवाई करून ५ लाख २१ हजार ९५० रुपयांचा दंड वसूल करण्यात आला. या मोहिमेत जळगाव शहर वाहतूक शाखा, भुसावळ शहर, चाळीसगाव शहर वाहतूक शाखेसह जिल्ह्यातील सर्व पोलीस ठाण्यांनी सक्रिय सहभाग नोंदवला. भविष्यातही अशाच प्रकारच्या विशेष मोहिमा राबवून वाहतूक शिस्त कडकपणे अंमलात आणली जाईल, असा इशारा पोलीस प्रशासनाने दिला आहे.
