जळगाव समाचार डेस्क | १६ जानेवारी २०२५
शहरातील शिवराम नगर परिसरात बुधवारी सकाळी भरधाव बुलेट आणि कार यांच्यात जोरदार अपघात झाला. या अपघातात बुलेटस्वार तरुण बुलेटसह गटारीत पडून किरकोळ जखमी झाला. ही घटना सकाळी साडेसात वाजेच्या सुमारास सेंट जोसेफ शाळेजवळ घडली.
शहरातील महाविद्यालयीन तरुणांद्वारे भरधाव दुचाकी चालविण्यामुळे अपघाताच्या घटना वाढत आहेत. हे रोखण्यासाठी वाहतूक विभागाने अल्पवयीन दुचाकीस्वारांवर कारवाईची मोहीम सुरू केली होती. मात्र, बुधवारी सकाळी (एमएच १९, ईडी ९९२९) क्रमांकाच्या बुलेटवरून ओंकारेश्वर मंदिराकडून जाणारा एक विद्यार्थी अत्यंत वेगाने जात होता. यावेळी समोरून येणाऱ्या (एमएच १९, ईजी १५५८) क्रमांकाच्या कारसोबत त्याची जोरदार धडक झाली.
धडक इतकी जोरदार होती की, बुलेटस्वार तरुण गटारीत जाऊन पडला आणि कारच्या पुढील भागाचे मोठे नुकसान झाले. मात्र, कारमधील एअरबॅग उघडल्यामुळे कार चालकाला गंभीर इजा झाली नाही. अपघातानंतर नागरिकांनी तात्काळ घटनास्थळी धाव घेत बुलेटस्वार तरुणाला गटारीतून बाहेर काढले.
अपघाताची नोंद रात्री उशिरापर्यंत पोलीस ठाण्यात झालेली नव्हती. सध्या जखमी तरुणाची प्रकृती स्थिर असून अपघाताबाबत पुढील तपास सुरू आहे.
शहरातील अशा घटनांवर नियंत्रण ठेवण्यासाठी तरुणांनी वाहतुकीचे नियम पाळावेत, अशी मागणी नागरिकांकडून केली जात आहे.
