जळगाव समाचार डेस्क | २७ ऑगस्ट २०२४
जळगाव (Jalgaon) शहरातील भास्कर मार्केट परिसरात असलेल्या एका हॉटेलमध्ये मंगळवारी रात्री ७ वाजेच्या सुमारास घडलेल्या गोळीबाराच्या घटनेने परिसरात खळबळ उडाली आहे. हॉटेलमध्ये टेबलावर बसलेल्या एका गटातील तरुणाने अचानक गोळीबार केला, ज्यामुळे तेथील इतर लोकांमध्ये घबराट निर्माण झाली. घटनेचा सर्व तपशील सीसीटीव्ही कॅमेऱ्यात कैद झाला असून, जिल्हापेठ पोलीस या प्रकरणाचा तपास करत आहेत.
मिळालेल्या माहितीनुसार, जळगाव शहरातील भास्कर मार्केट परिसरात असलेल्या एका बियर बारमध्ये काही तरुण मंगळवारी सायंकाळी मद्यप्राशन करत होते. या वेळी अचानक ७ वाजेच्या सुमारास एका तरुणाने टेबलाच्या खाली १ राउंड फायर केला. गोळीबारानंतर लगेचच त्या ठिकाणी उपस्थित सर्व तरुणांनी पळ काढला.
या घटनेची माहिती हॉटेलमधील इतर लोकांना तात्काळ कळू शकली नाही. परंतु, काही वेळाने जिल्हापेठ पोलिसांना याची माहिती मिळाली. पोलीस घटनास्थळी पोहचले आणि त्यांनी चौकशीला सुरुवात केली. पोलिसांना घटनास्थळावर रिकामा राऊंड सापडला आहे. ही संपूर्ण घटना सीसीटीव्ही कॅमेऱ्यात स्पष्टपणे दिसत आहे.
दरम्यान, फायरिंग करणाऱ्या तरुणासह अन्य लोकांची ओळख पटली असून पोलीस त्यांचा शोध घेत आहेत. या घटनेनंतर परिसरात घबराटीचे वातावरण निर्माण झाले आहे. यासंदर्भात उपविभागीय पोलीस अधिकारी संदीप गावीत यांनी घटनास्थळाला भेट दिली असून, तपासाची प्रक्रिया अधिक गतीने सुरू करण्यात आली आहे.
पोलीस या प्रकरणाचा कसून तपास करत असून, या गोळीबारामागचे कारण अद्याप स्पष्ट झालेले नाही. हॉटेलमधील सीसीटीव्ही फुटेजच्या आधारे अधिक तपशील मिळवून पुढील कारवाई केली जाणार आहे.
