जळगाव समाचार | २३ ऑक्टोबर २०२५
भारत आणि ऑस्ट्रेलिया यांच्यातील ३ वनडे सामन्यांच्या मालिकेतील दुसरा सामना अॅडलेड ओव्हलवर सुरू आहे. ऑस्ट्रेलियाने नाणेफेक जिंकून प्रथम गोलंदाजी करण्याचा निर्णय घेतला, तर भारतीय संघ प्रथम फलंदाजीसाठी मैदानावर उतरलाय. भारताला सुरूवातीस अपेक्षित सुरुवात मिळालेली नाही; शुबमन गिल अवघ्या ९ धावा करून माघारी परतला, तर विराट कोहली तिसऱ्या चेंडूवर शून्यावर बाद झाला. माघारी जाताना हात वर करून दिलेला इशारा चर्चेचा विषय ठरला आहे, ज्यावरून विराट लवकरच निवृत्ती जाहीर करु शकतो, अशी चर्चा रंगली आहे.
कोहली आयसीसी चॅम्पियन्स ट्रॉफी २०२५ नंतर पहिल्यांदाच वनडे मालिकेत उतरला आहे. सात महिन्यांच्या अंतरानंतर पुनरागमन करताना त्याला अपेक्षित कामगिरी करता आलेली नाही. मालिकेतील पहिल्या सामन्यात पर्थमध्ये विराटने ८ चेंडू खेळले होते, पण त्याला खातं उघडता आले नव्हते. अॅडलेडमधील दुसऱ्या सामन्यातही त्याला सुरुवात मिळाली नाही आणि त्याचा डाव झेलबाद होऊन लवकरच संपला. सहसा एकेरी-दुहेरी धावा सहज घेणारा विराट या सामन्यात संघर्ष करताना दिसला.
अॅडलेड स्टेडियम विराट कोहलीच्या आवडत्या मैदानांपैकी एक आहे आणि त्याचा या मैदानावरचा रेकॉर्ड दमदार राहिला आहे. मात्र, या दौऱ्यावर हा त्याचा शेवटचा सामना असल्याची माहिती आहे. त्यामुळे आवडत्या मैदानावर शून्यावर बाद झाल्यानंतर मैदानाबाहेर जाताना तो नाराज दिसला. सामन्याचे वातावरण आणि फलंदाजीकडे पाहणाऱ्या चाहत्यांच्या टाळ्यांनी त्याचा आत्मविश्वास वाढवण्याचा प्रयत्न केला.
कोहलीने मैदानाबाहेर जाताना हात वर करून जो इशारा दिला, त्यावरून अनेक चर्चा रंगल्या आहेत. काही तज्ज्ञांचे म्हणणे आहे की, हा इशारा वनडे क्रिकेटमधून निवृत्तीच्या सूचनेचा भाग असू शकतो, तर दुसरीकडे अंदाज असाही आहे की, हा त्याच्या आवडत्या मैदानावरच्या शेवटच्या सामन्यात चाहत्यांना अभिवादन करण्याचा इशारा होता. या सामन्यामुळे विराटच्या भविष्यातील वनडे कारकिर्दीबाबत उत्सुकता निर्माण झाली आहे.
