जळगाव समाचार | २६ मार्च २०२५
वरणगावजवळील वेल्हाळे शिवारात २५ वर्षीय विवाहितेची हत्या करून फरार झालेल्या पतीला अखेर पुण्यातून अटक करण्यात आली आहे. जळगाव स्थानिक गुन्हे शाखेच्या पथकाने ही कारवाई केली असून आरोपीला जळगावात आणण्यात आले आहे.
सना अजीज शेख (वय २५, रा. बीड, परळी वैजनाथ) हिची पती अजीज सलीम शेख (वय ३५) याने कौटुंबिक वादातून हत्या केली होती. रविवारी मध्यरात्री वरणगावजवळील वीटभट्टीवर हा प्रकार घडला. घटनेनंतर आरोपी अजीज शेख फरार झाला होता.
सना शेख आणि तिचा पती अजीज शेख हे कुटुंबासह वीटभट्टीवर काम करत होते. अजीज शेख याला दारूचे व्यसन होते आणि तो सतत पत्नीला मारहाण करत होता. शनिवारी रात्रीही त्याने मद्यप्राशन करून घरी येऊन सनासोबत वाद घातला. मध्यरात्रीच्या सुमारास त्याने दारूच्या नशेत तिचा गळा आवळून हत्या केली.
रविवारी सकाळी सना हिच्या कुटुंबीयांनी तिला पाहण्याचा प्रयत्न केला, मात्र खोलीतून प्रतिसाद मिळाला नाही. अखेर खिडकीतून पाहिले असता सना निपचीत पडलेली दिसली. दरवाजा तोडून आत गेल्यानंतर तिला तत्काळ ग्रामीण रुग्णालयात नेण्यात आले, मात्र डॉक्टरांनी तिला मृत घोषित केले.
या घटनेनंतर वरणगाव पोलिस ठाण्यात अजीज शेख याच्याविरोधात खुनाचा गुन्हा दाखल करण्यात आला. तो मध्यरात्रीच फरार झाला होता. त्याचा शोध घेत असताना जळगाव गुन्हे शाखेला तो पुण्यात आढळून आला. पोलिस उपनिरीक्षक शरद बागल व कृष्णा देशमुख यांच्या पथकाने मंगळवारी दुपारी त्याला अटक केली. आरोपीला आता पुढील कारवाईसाठी जळगावात आणण्यात आले आहे.
