जळगाव समाचार डेस्क| ११ ऑगस्ट २०२४
विधानसभा निवडणुकीच्या तयारीला वेग आला आहे, आणि त्यासोबतच राजकीय नेत्यांचे दौरेही सुरू झाले आहेत. राष्ट्रवादी काँग्रेसच्या शरद पवार गटाच्या नेत्या, खासदार सुप्रिया सुळे, आणि शिवसेना (उद्धव बाळासाहेब ठाकरे) गटाचे नेते, खासदार संजय राऊत, आगामी विधानसभा निवडणुकांच्या दृष्टीने जळगाव (Jalgaon) जिल्ह्यातील कार्यकर्त्यांशी संवाद साधणार आहेत.
सुप्रिया सुळे यांचा 17 ऑगस्टचा महिला मेळावा दौरा
खासदार सुप्रिया सुळे 17 ऑगस्ट रोजी जळगाव जिल्ह्याच्या दौऱ्यावर येत आहेत. या दौऱ्यात त्यांनी चाळीसगाव, धरणगाव, आणि पारोळा येथे एक दिवसात तीन महिला मेळावे आयोजित केले आहेत. या मेळाव्यांमध्ये त्या महिलांशी संवाद साधणार असून, आगामी निवडणुकांसाठी पक्षाच्या तयारीचा आढावा घेणार आहेत. महिलांचा सशक्तीकरण आणि राजकीय सहभाग वाढवण्यासाठी सुळे या मेळाव्यांचा वापर करणार असल्याचे समजते.
संजय राऊतांचा चार दिवसीय जिल्हा दौरा
खासदार संजय राऊत हे 20 ते 23 ऑगस्ट दरम्यान जळगाव जिल्ह्यात चार दिवसांचा दौरा करणार आहेत. त्यांच्या दौऱ्याचा प्रारंभ 20 ऑगस्ट रोजी जळगावमध्ये होणार असून, ते 21 ते 23 ऑगस्ट दरम्यान जळगाव शहर, पाचोरा, चाळीसगाव, पारोळा, चोपडा, आणि जामनेर येथे कार्यकर्त्यांशी संवाद साधतील. त्यांच्या या दौऱ्यात स्थानिक नेत्यांशी चर्चा आणि आगामी निवडणुकांसाठी पक्षाच्या रणनितीवर चर्चा होणार आहे.
राजकीय दौऱ्यांच्या तयारीला वेग
दोन्ही नेत्यांच्या दौऱ्यांच्या निमित्ताने स्थानिक नेते आणि पदाधिकारी यांनी जोरदार तयारी सुरू केली आहे. विधानसभा निवडणुकीच्या पार्श्वभूमीवर होणाऱ्या या दौऱ्यांमुळे जळगाव जिल्ह्यात राजकीय वातावरण तापले आहे. आगामी निवडणुकांमध्ये कोणताही राजकीय पक्ष कमी पडू नये यासाठी नेते मंडळींनी जिल्ह्याचे दौरे हाती घेतले आहेत.
