जळगाव समाचार | ७ एप्रिल २०२५
वर्धा येथून एक धक्कादायक घटना समोर आली आहे. नवरात्रीच्या नवमीच्या दिवशी दर्शनासाठी गेलेल्या कुटुंबावर मोठं दु:ख कोसळलं. मरीमाय मंदिरात पूजा सुरू असतानाच बाहेर खेळणाऱ्या तीन वर्षांच्या चिमुकलीवर झाड कोसळून तिचा मृत्यू झाला असून, पूर्वा शरद दंडारे असं या मयत चिमुकलीचं नाव आहे.
याबाबत सविस्तर वृत्त असे की, शरद दंडारे, त्यांची पत्नी आणि मुलगी पूर्वा तिघेही पुलगाव मार्गावरील शोभा काळे यांच्या शेतातील मरीमाय मंदिरात नवरात्रीनिमित्त पूजेसाठी गेले होते. पूजा सुरू असताना पूर्वा मंदिराबाहेर खेळत होती. दरम्यान, जोरदार वाऱ्यामुळे एक वाळलेलं झाड अचानक कोसळलं आणि ते थेट पूर्वावर पडले.
घटना लक्षात येताच आई-वडीलांनी धावत जात तिला बाहेर काढलं. स्थानिकांच्या मदतीने झाड बाजूला करण्यात आलं आणि तिला तातडीने उपजिल्हा रुग्णालयात नेण्यात आलं. मात्र डॉक्टरांनी तिला मृत घोषित केलं.
या दुर्दैवी घटनेनंतर परिसरात हळहळ व्यक्त करण्यात येत आहे. नवरात्रीसारख्या पवित्र सणाच्या दिवशी घडलेली ही घटना काळजाला चटका लावणारी ठरली आहे.
