जळगाव समाचार डेस्क | २७ जानेवारी २०२५
वनविभागाच्या गस्त घालणाऱ्या पथकाने रावेर-सावदा रस्त्यावर अवैधरीत्या सागवानी पलंग व सोफा सेटची वाहतूक करणारे वाहन जप्त केले आहे. ही कारवाई 26 जानेवारी रोजी रात्री 1 वाजता सावदा गावाजवळ करण्यात आली. या कारवाईत सुमारे दोन लाख रुपयांचा मुद्देमाल हस्तगत करण्यात आला आहे.
सूत्रांच्या माहितीनुसार, रावेर-सावदा रस्त्यावर टाटा कंपनीच्या एमएच 04 एफजे 3248 या क्रमांकाच्या वाहनात सागवानी चार पलंग आणि एक सोफा सेट आढळून आला. वनपरिक्षेत्र अधिकाऱ्यांनी वाहनचालक गणेश भिमराव खैरनार (वय 27, रा. जळगाव) याला परवान्यासंबंधी विचारले असता त्याने कोणताही परवाना नसल्याचे सांगितले.
या मुद्देमालात सागवानी साहित्याची किंमत 64,500 रुपये असून मालवाहतूक करणाऱ्या वाहनाची किंमत 1 लाख 26 हजार रुपये इतकी आहे. अशा प्रकारे एकूण 1 लाख 90 हजार 500 रुपयांचा मुद्देमाल जप्त करण्यात आला आहे.
ही कारवाई धुळे वनसंरक्षक निनू सोमराज, यावल उपवनसंरक्षक जमीर शेख, विभागीय वनाधिकारी आर.आर. सदगीर, चोपडा सहायक वनसंरक्षक प्रथमेश हडपे, यावल सहाय्यक वनसंरक्षक समाधान पाटील यांच्या मार्गदर्शनाखाली वनपरिक्षेत्र अधिकारी अजय बावणे, रवींद्र सोनवणे, सुपडू सपकाळे, जगदीश जगदाळे आदींच्या पथकाने केली.
