जळगाव समाचार डेस्क | २० ऑक्टोबर २०२४
राज्यात विधानसभा निवडणुकीची धामधूम सुरू झाली असून, महायुतीतील भारतीय जनता पार्टीने (भाजप) पहिली उमेदवार यादी जाहीर केली आहे. या यादीत काही जुन्या नेत्यांचा पत्ता कट करण्यात आला आहे, तर अनेक विद्यमान आमदारांना पुन्हा एकदा संधी मिळाली आहे.
जळगाव शहर विधानसभा मतदारसंघासाठी विद्यमान आमदार सुरेश (राजू मामा) भोळे यांना भाजपने तिसऱ्यांदा संधी दिली आहे, ज्यामुळे त्यांना हॅट्रिक साधण्याची संधी मिळणार आहे. भुसावळ मतदारसंघात विद्यमान आमदार संजय वामन सावकारे यांची उमेदवारी फायनल करण्यात आली आहे. चाळीसगाव मतदारसंघातून मंगेश चव्हाण यांना पुन्हा एकदा उमेदवारी देण्यात आली आहे, तर जामनेर विधानसभा मतदारसंघातून गिरीश महाजन यांचे नाव पहिल्या यादीत समाविष्ट करण्यात आले आहे.
अन्य उमेदवारांची नावे अशी:
शिरपूरमधून काशीराम पावरा, रावेरमधून अमोल जावळे, खामगावमधून आकाश फुंडकर, जळगाव (जामोद) मतदारसंघातून संजय कुटे, अकोला पूर्वमधून रणधीर सावरकर, धामगाव रेल्वे मतदारसंघातून प्रताप अडसद, अचलपूरमधून प्रवीण तायडे, देवळीतून राजेश बकाणे, हिंगणाघाटमधून समीर कुणावर आणि डोंबिवलीमधून रविंद्र चव्हाण यांना पुन्हा उमेदवारी देण्यात आली आहे.
या यादीतून भाजपने विद्यमान आमदारांवर विश्वास ठेवत त्यांना पुन्हा एकदा संधी दिली आहे, तर काही नेत्यांना बाजूला ठेवत नव्या चेहऱ्यांना उमेदवारी दिली आहे. या बदलांमुळे निवडणुकीत कोणते नवे समीकरण तयार होणार, याकडे सर्वांचे लक्ष लागले आहे.
