जळगाव समाचार डेस्क| २४ ऑगस्ट २०२४
नेपाळमधील पोखरा-काठमांडू मार्गावरील भीषण बस अपघातात जळगाव जिल्ह्यातील २४ जणांचा मृत्यू झाला आहे. या दुर्घटनेमुळे संपूर्ण जिल्ह्यात शोककळा पसरली आहे. मुख्यमंत्री एकनाथ शिंदे यांनी या घटनेबद्दल तीव्र दुःख व्यक्त करत मृतांच्या कुटुंबीयांना सहवेदना दिल्या आहेत. मृतदेह तातडीने महाराष्ट्रात आणण्यासाठी मुख्यमंत्री शिंदे यांनी केंद्रीय गृहमंत्री अमित शाह यांच्यासह वरिष्ठ अधिकाऱ्यांशी तातडीने संवाद साधला. केंद्रीय गृहमंत्री शाह यांनी या प्रकरणी सर्वतोपरी सहकार्याचे आश्वासन दिले.
मुख्यमंत्री शिंदे यांच्या विनंतीनुसार, उद्या शनिवारी भारतीय वायुसेनेच्या विशेष विमानाने २४ मृतदेह नाशिक येथे आणले जाणार आहेत. त्यानंतर हे मृतदेह त्यांच्या कुटुंबीयांना सुपूर्द केले जातील. नेपाळ प्रशासनाने या प्रकरणी सहकार्याची ग्वाही दिली आहे. दुर्घटनेत २७ प्रवाशांचा मृत्यू झाला असून, त्यातील २५ जण भुसावळ तालुक्यातील असल्याचे निष्पन्न झाले आहे.
काल सकाळी नेपाळमधील पोखरा आणि काठमांडू दरम्यान ही दुर्घटना घडली. मास्यार्गाडी नदीच्या पात्रात बस कोसळून २७ प्रवाशांचा मृत्यू झाला. यात बहुतेक प्रवासी भुसावळ तालुक्यातील वरणगाव आणि तळवेल परिसरातील होते. या अपघातामुळे परिसरात शोककळा पसरली असून, संपूर्ण गावावर दुःखाचा डोंगर कोसळला आहे. सकाळी १४ जणांच्या मृत्यूची बातमी आली होती, परंतु रात्री उशीरा नेपाळ प्रशासनाने मृतांची अधिकृत संख्या २७ असल्याचे जाहीर केले.
भुसावळचे आमदार संजय सावकारे आपल्या सहकाऱ्यांसह नेपाळला रवाना झाले असून, ते आज सकाळी अपघातस्थळी पोहोचण्याची अपेक्षा आहे. माजी मंत्री एकनाथ खडसे यांनी वरणगाव आणि तळवेल येथे भेट देऊन मृतांच्या कुटुंबीयांची विचारपूस केली. त्यांनी नेपाळमधील परिस्थितीबद्दल माहिती घेतली आहे.
या अपघातात १६ प्रवासी बचावले असून, त्यापैकी १२ जण गंभीर जखमी आहेत. त्यांना तातडीने काठमांडू येथे हलवण्यात आले आहे. अन्य ४ जणांनाही प्राथमिक उपचारानंतर काठमांडूला नेण्यात आले आहे. पुढील उपचारांसाठी सर्व जखमींना मुंबई येथे आणले जाणार आहे. दुसऱ्या बसमधील भाविकांना सुरक्षितपणे भुसावळकडे रवाना करण्यात आले आहे.
मुख्यमंत्री शिंदे यांनी केंद्र सरकारच्या सहकार्याने मृतांच्या पार्थिवांना तातडीने भारतात आणण्याची व्यवस्था केली आहे. या दुर्दैवी घटनेमुळे जळगाव जिल्ह्यात शोककळा पसरली असून, संपूर्ण गावात हळहळ व्यक्त केली जात आहे. मृतांच्या अंत्यसंस्कारासाठी प्रशासनाने आवश्यक ती तयारी केली असून, त्यांच्या पार्थिवांचे गावात अंत्यसंस्कार करण्यात येणार आहेत.
या घटनेने जळगाव जिल्ह्यातील वरणगाव, तळवेल आणि भुसावळ तालुक्यांमध्ये शोककळा पसरली आहे. मृतांच्या कुटुंबियांसाठी हे एक अत्यंत कठीण काळ आहे. त्यांच्या दुःखात सहभागी होत, प्रशासनाने सर्वतोपरी सहकार्याची ग्वाही दिली आहे.
