जळगाव समाचार डेस्क;
भारताचे पंतप्रधान नरेंद्र मोदी (PM Narendra Modi) आणि रशियाचे अध्यक्ष व्लादिमीर पुतिन (Vladimir Putin)यांच्यात झालेल्या द्विपक्षीय भेटीत महत्त्वाच्या मुद्द्यांवर चर्चा झाली. चर्चेदरम्यान पीएम मोदी म्हणाले की, रशियामध्ये (Russia) झालेल्या दहशतवादी हल्ल्याची वेदना भारताला जाणीव आहे. आगामी काळात भारत आणि रशियामधील संबंध अधिक दृढ होतील. रशियाच्या मदतीने भारताला स्वस्त तेल मिळत असल्याचं पीएम मोदी म्हणाले. महामहिम आणि माझे मित्र, या हार्दिक स्वागत आणि सन्मानाबद्दल मी तुमची कृतज्ञता व्यक्त करतो. भारतातील निवडणुकीत आमच्या अभूतपूर्व विजयानंतर तुम्ही दिलेल्या शुभेच्छांबद्दलही मी तुमचे आभार व्यक्त करतो. मार्चमध्ये, तुम्हाला देखील पुन्हा एकदा मी तुम्हाला निवडणुकीत विजयासाठी शुभेच्छा देतो.
दहशतवादाचा तीव्र निषेध
भारतीय पंतप्रधान म्हणाले, भारत गेल्या 40-50 वर्षांपासून दहशतवादाचा सामना करत आहे. दहशतवाद किती भयानक आहे. याचा सामना आम्ही गेली 40 वर्षे करत आहोत. त्यामुळे जेव्हा मॉस्कोमध्ये दहशतवादी घटना घडल्या, दागेस्तानमध्ये दहशतवादी घटना घडल्या तेव्हा त्यांच्या वेदना किती खोलवर गेल्या असतील याची मी कल्पना करू शकतो. मी सर्व प्रकारच्या दहशतवादाचा तीव्र निषेध करतो.
पीएम मोदी म्हणाले, “गेल्या 2.5 दशकांपासून माझे रशियासोबत तसेच तुमच्याशीही संबंध आहेत. आम्ही सुमारे 10 वर्षांत 17 वेळा भेटलो आहोत. गेल्या 25 वर्षांत आमच्यात सुमारे 22 द्विपक्षीय बैठका झाल्या आहेत. हे त्याचे उदाहरण आहे.
मॉस्कोमध्ये रशियाचे अध्यक्ष व्लादिमीर पुतिन यांच्यासोबत झालेल्या भेटीत पंतप्रधान मोदी म्हणाले की, जगासमोर इंधनाचे आव्हान असताना तुमच्या सहकार्यामुळे सर्वसामान्यांच्या पेट्रोल आणि डिझेलच्या गरजा पूर्ण करण्यात मदत झाली. एवढेच नव्हे तर आंतरराष्ट्रीय बाजारपेठेत स्थैर्य आणण्यात भारत-रशिया कराराने मोठी भूमिका बजावली आहे, हे जगाने मान्य केले पाहिजे.
भारत शांततेच्या बाजूने
बैठकीत पीएम मोदी म्हणाले, “शांतता प्रस्थापित करण्यासाठी भारत सर्व प्रकारे सहकार्य करण्यास तयार आहे. मी तुम्हाला आणि जागतिक समुदायाला खात्री देतो की भारत शांततेच्या बाजूने आहे. काल माझे मित्र पुतिन शांततेबद्दल बोलत होते हे ऐकून मला आशा निर्माण झाली. मी माझ्या मीडियाच्या मित्रांना सांगू इच्छितो – हे शक्य आहे.
राष्ट्राध्यक्ष पुतिन यांच्यासोबत 22 व्या भारत-रशिया वार्षिक शिखर बैठकीसाठी पंतप्रधान मोदी सोमवारी दोन दिवसांच्या रशिया दौऱ्यावर आले. पुतीन यांनी सोमवारी रात्री मॉस्कोच्या बाहेरील त्यांच्या नोवो-ओगार्योवो या अधिकृत निवासस्थानी मोदींसाठी एका खाजगी डिनरचे आयोजन केले होते. मॉस्कोमध्ये आल्यानंतर लगेचच, मोदी म्हणाले होते की ते भविष्यात द्विपक्षीय भागीदारी अधिक दृढ करण्यासाठी उत्सुक आहेत आणि मजबूत भारत-रशिया संबंधांचा आमच्या लोकांना खूप फायदा होईल.
