जळगाव समाचार डेस्क। २९ ऑगस्ट २०२४
बदलापूरमधील दोन अल्पवयीन मुलींवर झालेल्या अत्याचाराच्या घटनेनंतर राज्यात संतापाची लाट उसळली होती, त्याच धर्तीवर आता नंदुरबारमध्ये देखील एक धक्कादायक घटना घडली आहे. नंदुरबार येथील एका नामांकित शाळेत कंत्राटी सफाई कर्मचाऱ्याने पाचवीत शिकणाऱ्या अल्पवयीन विद्यार्थिनीचा विनयभंग केल्याची घटना उघडकीस आली आहे. आरोपीने विद्यार्थिनीला मोबाईलमध्ये अश्लील व्हिडिओ दाखवण्याचा संतापजनक प्रकार केला असून, ही घटना शाळेतील सीसीटीव्हीमध्ये कैद झाली आहे.
विद्यार्थिनीने ही घटना आपल्या पालकांना सांगितल्यानंतर, पालकांनी नंदुरबार शहर पोलिस ठाण्यात तक्रार दाखल केली. या तक्रारीनुसार, पोलिसांनी आरोपीविरुद्ध बाललैंगिक अत्याचार कायद्याखाली गुन्हा दाखल करून त्याला ताब्यात घेतले आहे. तसेच, संबंधित शाळेने आरोपी कर्मचाऱ्याला तत्काळ बडतर्फ केले आहे.
या घटनेमुळे पालकांमध्ये भीतीचे वातावरण निर्माण झाले आहे. पालकांना आता आपल्या मुलांना शाळेत पाठवणे सुरक्षित वाटत नसल्याचे दिसून येत आहे. नंदुरबार पोलिस अधीक्षक श्रावण दत्त एस यांनी माहिती दिली की, या प्रकरणी शहर पोलिसात गुन्हा दाखल झाला असून तपास सुरू आहे.
राज्यात महिलांविरोधात वाढत्या गुन्हेगारीमुळे चिंता व्यक्त केली जात आहे. महाविकास आघाडीने याच्या निषेधार्थ राज्यभर आंदोलन केले असून, महिलांच्या आणि मुलींच्या सुरक्षेसाठी कठोर पावले उचलण्याची मागणी जोर धरत आहे. विशेष म्हणजे, शाळांमध्ये सुद्धा मुली सुरक्षित नाहीत, ही परिस्थिती अत्यंत गंभीर मानली जात आहे.
