जळगाव समाचार डेस्क| १० ऑगस्ट २०२४
नेहमीच गर्दीने भरलेले दादर रेल्वे स्थानक शुक्रवारी (09 ऑगस्ट) एका धक्कादायक घटनेने हादरले. नंदिग्राम एक्सप्रेसच्या शौचालयात 50 वर्षीय पुरुषाचा गळफास घेतलेला मृतदेह सापडल्यामुळे स्थानकात एकच खळबळ उडाली आहे. या घटनेने प्रवाशांमध्ये भीतीचे वातावरण निर्माण झाले असून, पोलिसांनी तात्काळ या प्रकरणाची चौकशी सुरू केली आहे.
शुक्रवारी सकाळी, नंदिग्राम एक्सप्रेसच्या शौचालयात 50 वर्षांचा एक पुरुष गळफास घेतलेल्या अवस्थेत आढळला. मृत व्यक्तीच्या ओळखीची पुष्टी झाल्यानंतर पोलिसांनी सांगितले की, तो घाटकोपर येथील रहिवासी होता. काही दिवसांपूर्वी त्याच्यावर एका महिलेच्या छेडछाडीचा गुन्हा दाखल करण्यात आला होता. या आरोपांमुळे तो मानसिक तणावात असल्याची शक्यता असून, याच तणावातून त्याने आपल्या जीवनाचा शेवट करण्याचा निर्णय घेतला असावा, असा प्राथमिक संशय आहे.
प्रारंभिक तपासात समोर आले की, मृत व्यक्तीने शौचालयात मफलरच्या साहाय्याने गळफास लावून आत्महत्या केली. पोलिसांना मृत व्यक्तीच्या वैयक्तिक आयुष्याबद्दल माहिती मिळवण्यासाठी त्याच्या कुटुंबीयांची आणि जवळच्या व्यक्तींची चौकशी करायची आहे.
दादर रेल्वे स्थानकावर अशा प्रकारच्या घटना घडत असल्याने प्रवाशांच्या सुरक्षिततेबाबत प्रश्न निर्माण झाले आहेत. रेल्वे पोलिस आणि सुरक्षा कर्मचाऱ्यांनी स्थानकांवरील सुरक्षेची अधिक दक्षता घेतली आहे. परंतु, अशा घटनांना कसे आळा घालता येईल याबाबत अधिक उपाययोजना करण्याची गरज आहे.
मृत व्यक्तीवर घाटकोपरमध्ये छेडछाडीचा गुन्हा दाखल होता. या गुन्ह्यामुळेच तो फरार होता आणि त्याच्या तणावामुळे त्याने आत्महत्या केली असावी, असा प्राथमिक संशय आहे. पोलीस या दृष्टीनेही तपास करत आहेत.
