जळगाव समाचार, अमळनेर (प्रतिनिधी) :
गणेशोत्सव व आगामी ईद-ए-मिलाद सणाच्या पार्श्वभूमीवर शहरातील कायदा व सुव्यवस्था अबाधित राहावी, सार्वजनिक शांतता कायम राहावी यासाठी अमळनेर पोलीस उपविभागातर्फे मॉक ड्रिल व रूट मार्चचे आयोजन करण्यात आले.
आज, गुरुवार दि. २८ ऑगस्ट रोजी सकाळी ९.४५ ते ११.४५ या वेळेत पोलीस मुख्यालय जळगाव येथील कवायत निर्देशक यांच्या मार्गदर्शनाखाली तसेच उपविभागीय पोलीस अधिकारी विनायक कोते व पोलीस निरीक्षक दत्तात्रय निकम यांच्या उपस्थितीत डॉ. बाबासाहेब आंबेडकर चौक, गांधलीपुरा येथे दंगा काबू योजनेचा सराव घेण्यात आला. या सरावात ढाल, लाठी, गॅसगन, शिल्ड, ग्रेनेड आदी साहित्याच्या साहाय्याने प्रत्यक्ष प्रात्यक्षिके दाखविण्यात आली.
सरावानंतर शहरातील संवेदनशील भागांमध्ये — डॉ. बाबासाहेब आंबेडकर चौक, सुभाष चौक, बाजारपेठ, तिरंगा चौक, कुंटे रोड, पवन चौक, झामी चौक, आखाडा मकान, कसाली डीपी, जामा मशीद, सराफ बाजार, दगडी दरवाजा, गुळ बाजार व गांधलीपुरा चौकी परिसरात रूट मार्च काढण्यात आला.
या रूट मार्चमध्ये अमळनेर, मारवड, पारोळा, एरंडोल पोलीस स्टेशनचे अधिकारी व अंमलदार तसेच पोलीस मुख्यालयातील दंगा नियंत्रण पथक, स्ट्रायकिंग फोर्स व एकूण ६२ होमगार्ड सहभागी झाले. अमळनेर पोलीस स्टेशनकडील ४ अधिकारी व ३६ अंमलदार, मारवडहून १ अधिकारी व ११ अंमलदार, पारोळा येथून १० अंमलदार, तर एरंडोलहून ७ अंमलदार सहभागी झाले होते.
या सराव व रूट मार्चदरम्यान स्थानिक नागरिकांचा उत्स्फूर्त व सकारात्मक प्रतिसाद दिसून आला.
