जळगाव समाचार डेस्क | ३१ ऑगस्ट २०२४
शहरातील काशिबाई उखाजी कोल्हे विद्यालयाजवळील जुना खेडी रोडवर गावठी पिस्तूल घेऊन फिरणाऱ्या एका अल्पवयीन मुलाला शनीपेठ पोलिसांनी ताब्यात घेतले आहे. या प्रकरणी संबंधित मुलाविरुद्ध शनीपेठ पोलीस ठाण्यात गुन्हा दाखल करण्यात आला आहे.
पोलीस उपनिरीक्षक चंद्रकांत धनके यांना जुना खेडी रोडवर एका अल्पवयीन मुलाने गावठी पिस्तूल बाळगल्याची आणि त्या परिसरात दहशत माजवण्याचा प्रयत्न केल्याची माहिती मिळाल्यानंतर त्यांनी तत्काळ कारवाईचा आदेश दिला. २९ ऑगस्ट रोजी दुपारी, पोलीस नाईक किरण वानखेडे, पोहेकॉ विजय खैरे, विक्की इंगळे, योगेश साबळे आणि मुकुंद गंगावणे यांनी त्या ठिकाणी धाव घेतली. पोलिसांची चाहूल लागताच पळण्याच्या तयारीत असलेल्या त्या मुलाचा पोलिसांनी पाठलाग करून ताब्यात घेतले.
मुलाच्या जवळून गावठी बनावटीची पिस्तूल जप्त करण्यात आली आहे. याप्रकरणी शनीपेठ पोलीस ठाण्यात गुन्हा दाखल करण्यात आला असून, या घटनेचा पुढील तपास सुरू आहे.
