जळगाव समाचार डेस्क| २४ जुलै २०२४
मनोज जरांगे पाटील यांच्या अडचणीत वाढ झाली आहे. पुण्यातील न्यायालयाने जरांगे यांच्याविरुद्ध मंगळवारी अजामीनपात्र वॉरंट जारी केले आहे. जालना येथे असलेल्या आपल्या गावात आरक्षणाच्या मागणीसाठी जरांगे पाटील हे उपोषणाला बसले आहेत. मनोज जरांगे पाटील यांच्या वकिलाने ही माहिती दिली आहे.
अजामीनपात्र वॉरंट का जारी करण्यात आले?
2013 च्या फसवणूक प्रकरणात पुणे न्यायालयाने मनोज जरांगे पाटील यांच्या विरोधात अजामीनपात्र वॉरंट जारी केले आहे. यापूर्वी ३१ मे रोजी जरांगे यांच्याविरुद्ध अजामीनपात्र वॉरंट जारी करण्यात आले होते. त्यानंतर जरांगे न्यायालयात हजर झाले. त्यानंतर न्यायालयाने अजामीनपात्र वॉरंट रद्द केले, परंतु त्यांना 500 रुपयांचा दंड ठोठावला होता. जरांगे यांना मंगळवारी याप्रकरणी न्यायदंडाधिकारी यांच्यासमोर हजर होणार होते, मात्र ते हजर झाले नाहीत.
जरांगे यांचे वकील काय म्हणाले?
अजामीनपात्र वॉरंट जारी झाल्यानंतर जरांगे पाटील यांच्या वकिलाने म्हटले आहे की जरांगे सध्या उपोषणाला बसले आहेत, त्यामुळे ते न्यायदंडाधिकाऱ्यांसमोर हजर राहू शकले नाहीत. आम्ही त्यांना न्यायालयात हजर करू आणि अजामीनपात्र वॉरंट रद्द करू. जरांगे आणि इतर दोघांविरुद्ध 2013 मध्ये भारतीय दंड संहितेच्या कलम 420 (फसवणूक) आणि 406 (गुन्हेगारी विश्वासभंग) अंतर्गत गुन्हा दाखल करण्यात आला होता.
