जळगाव समाचार डेस्क | १५ सप्टेंबर २०२४
जिल्हा महिला बालकल्याण विभागाच्या अधिकारी मयुरी करपे राऊत (वय ३२) यांचे शनिवारी, दि. १४ सप्टेंबर रोजी हृदयविकाराच्या झटक्याने दुःखद निधन झाले. जिल्हा कार्यक्रम अधिकारी देवेंद्र राऊत यांच्या त्या पत्नी होत्या. या घटनेने राऊत कुटुंबीयांवर शोककळा पसरली आहे.
प्राप्त माहितीनुसार, मयुरी करपे राऊत यांनी पती देवेंद्र यांना दुपारी ४ वाजता एका खाजगी रुग्णालयात रक्तदाबाचा त्रास जाणवत असल्याने तपासणीसाठी नेले होते. मात्र, याच दरम्यान मयुरी करपे यांची प्रकृती अचानक खालावली आणि त्या बेशुद्ध होऊन कोसळल्या. तत्काळ त्यांना आणि पती देवेंद्र राऊत यांना रुग्णालयात दाखल करण्यात आले, परंतु उपचारादरम्यान मयुरी करपे राऊत यांचा मृत्यू झाला.
मयुरी करपे राऊत यांचे पती देवेंद्र राऊत हे जिल्हा परिषदेत महिला बालकल्याण विभागाचे जिल्हा कार्यक्रम अधिकारी म्हणून कार्यरत आहेत, तर मयुरी करपे जिल्हा महिला बालकल्याण विभागात अधिकारी म्हणून कार्यरत होत्या. त्यांच्यामागे पतीसह दोन मुली असा परिवार आहे.
या दुःखद घटनेने राऊत कुटुंबीय आणि नातेवाईकांसह सरकारी अधिकारीवर्गात हळहळ व्यक्त करण्यात येत आहे. शवविच्छेदनासाठी मयताचे पार्थिव शासकीय वैद्यकीय महाविद्यालयात पाठविण्यात आले असून, घटनेची नोंद करण्यात आली आहे.
