जळगाव समाचार डेस्क;
जळगाव (Jalgaon) येथील 21 वर्षीय युवकाचा सोयगाव तालुक्यातील पळाशी येथील धारकुंड येथे रविवारी सायंकाळच्या सुमारास धबधब्यात अंघोळ करतांना शेवाळावर पाय घसरुन पडल्याने कुंडात बुडून मृत्यू झाल्याची घटना घडली आहे. गौरव किशोर नेरकर असे मयत मुलाचे नाव आहे.
याबाबत मिळालेल्या माहितीनुसार, गौरव किशोर नेरकर (21) हा युवक शहरातील खंडेराव नगर येथिल रहिवासी असून, तो मित्रांसोबत सोयगाव तालुक्यातील पळाशी येथील धारकुंड येथे धबधब्यावर फिरण्यासाठी गेले होते. यावेळी धबधब्याखाली अंघोळ करत असतांना दगडावर साचलेल्या शेवाळावरुन गौरवचा पाय घसरून तो कुंडात पडला. मात्र पोहता येत नसल्याने तो कुंडातील पाण्यात बुडाला. मित्रांनी हे दृश्य पाहून इतरंना मदतीसाठी हाक मारत आरडाओरडा केली. दरम्यान यावेळी त्याठिकाणावरील काही तरुणांनी पाण्यात उडया घेतल्या, मात्र गौरव हा मिळून आला नाही.
घटनेची माहिती मिळताच सोयगाव पोलीस ठाण्याचे सहाय्यक पोलीस निरीक्षक पंकट बारवाल, पोलीस उपनिरीक्षक शेख यांच्यासह कर्मचारी घटनास्थळी दाखल झाले. मात्र सायंकाळी अंधार पडल्यामुळे शोधकार्य रविवारी सायंकाळी थांबवून, सोमवारी सकाळी पुन्हा त्याला शोधण्याचे कार्य सुरु करण्यात आले. यावेळी त्याचा मृतदेह हाती लागला. त्याच्या मृतदेहाला जिल्हा रुग्णालयात त्याचे शवविच्छेदन करून परिवाराच्या ताब्यात देण्यात आला. त्याचा मृतदेह पाहून आईवडीलंनी एकच आक्रोश केला.
