जळगाव समाचार डेस्क | १९ ऑक्टोबर २०२४
मसुरी (उत्तराखंड) येथील लाल बहादूर शास्त्री राष्ट्रीय प्रशासन अकादमी (LBSNAA) च्या कर्मचारी निवासात १८ ऑक्टोबर रोजी २२ वर्षीय तरुणाने आत्महत्या केल्याची घटना उघडकीस आली आहे. या घटनेने परिसरात खळबळ उडाली आहे. मृतदेह साडी परिधान केलेल्या अवस्थेत आणि चेहऱ्यावर मेकअप केलेल्या स्थितीत आढळून आला.
मृत तरुणाची ओळख श्रीनगर, पौडी गढवाल येथील अनुकूल रावत म्हणून झाली आहे. तो अकादमीच्या मल्टी टास्किंग स्टाफ (MTS) विभागात काम करीत होता आणि अकादमीच्या आवासात एकटाच राहत होता. तो रात्री उशिरा आपल्या निवासात गेला होता, मात्र दुसऱ्या दिवशी तो कामावर न आल्याने त्याच्या सहकाऱ्यांनी त्याचे दार ठोठावले. आतून कोणताही प्रतिसाद न मिळाल्याने त्यांनी तातडीने पोलिसांना माहिती दिली.
पोलिसांनी घटनास्थळी येऊन कारपेंटरच्या मदतीने दरवाजा उघडला आणि मृतदेह ताब्यात घेतला. घटनास्थळाची छायाचित्रे आणि व्हिडिओग्राफी करण्यात आली असून मृतदेह पोस्टमार्टमसाठी पाठविण्यात आला आहे. तसेच, मृतकाचा मोबाइल पोलिसांनी जप्त केला आहे. या प्रकरणाची सखोल चौकशी सुरू असून, मृत्यूपूर्वी तरुणाने महिलांच्या वेशभूषेचे स्वरूप स्वतः धारण केले होते की, यामध्ये इतरांचा सहभाग आहे, हे तपासले जात आहे.
या घटनेमुळे अकादमीतील सर्व कर्मचारी आणि विद्यार्थी वर्गात दुःखाची आणि आश्चर्याची भावना आहे. यापूर्वीही उधमसिंह नगर जिल्ह्यात पंतनगर विमानतळावर तैनात असलेल्या एक असिस्टंट मॅनेजरने मुलीचा वेश धारण करून आत्महत्या केल्याची घटना घडली होती.
