नागपूर मध्यवर्ती कारागृहात केले स्थानबद्ध
जळगाव : आसोदा गावासह परिसरात दहशत निर्माण करणाऱ्या व विविध गंभीर गुन्हे दाखल असलेल्या वैभव विजय सपकाळे (वय १९, रा. आसोदा, ता. जळगाव) याच्यावर एमपीडीए अंतर्गत कारवाई करण्यात आली. त्याला नागपूर कारागृहात स्थानबद्ध करण्यात आले आहे. जळगाव तालुक्यातील आसोदा येथील वैभव सपकाळे याच्यावर खुनाचा प्रयत्न, पोलिसांवर हल्ला, शस्त्रासह जमाव जमविणे, दुखापत, जबरी चोरी यासारखे गंभीर गुन्हे दाखल आहेत. त्याने आसोदा गावात व परिसरात सर्वसामान्यांच्या मनात भीती व दहशत निर्माण केली होती. त्यामुळे तालुका पोलिस ठाण्याचे पोलिस निरीक्षक महेश शर्मा यांनी वैभवच्या स्थानबद्धतेचा प्रस्ताव जिल्हा पोलिस अधीक्षक डॉ. महेश्वर रेड्डी यांच्याकडे सादर केला. त्यांनी तो जिल्हाधिकारी आयुष प्रसाद यांच्याकडे पाठविला. त्यानुसार जिल्हाधिकाऱ्यांनी स्थानबद्धतेच आदेश दिले. तालुका पोलिसांनी सपकाळे याला ताब्यात घेत त्याला नागपूर कारागृहात दाखल केले
आहे.
