जळगाव (प्रतिनिधी) :-नदी पात्रात अवैध वाळू उपसा करतानाचे फोटो काढल्यावरून वाळूमाफियाने हवेत गोळीबार केल्याची घटना १७ सप्टेंबर रोजी घडली होती . या गोळीबार प्रकरणी स्थानिक गुन्हे शाखेच्या पथकाने गोळीबार करणाऱ्या संशयित आरोपीला अटक केली आहे.
संशयित आरोपी निवृत्ती उर्फ गोपाल गजानन सोनवणे (कोळी, वय ३२, रा. वाकटुकी, ता. धरणगाव), हा गुन्हा घडल्यापासून पसार झाला होता. चांदसर गावातील नदीपात्रातून वाळू उपसा होत होता.तो रोखण्यासाठी गावाबाहेर चाऱ्या खोदून रस्ता बंद करण्यात आला आहे. त्यामुळे अवैध वाळू उपसा बंद होता. अवैध वाळू उपसा करण्यासाठी वाकटुकी येथील काहीजण चाऱ्या बुजवत होते. याबाबत कोतवाल अमोल गुलाब मालचे यांना समजले. त्यांनी तेथे जाऊन त्यांना त्याचा जाब विचारला. याचा राग येऊन वाळू माफियांनी शिवीगाळ करून जिवे मारण्याची धमकी दिली. याच वेळी गोपाल कोळी यानी पिस्तूल काढून हवेत गोळीबार केलाहोता.
तर गावात त्याचा आवाज झाल्याने तेथेही धावपळ उडाली. हवेत गोळीबार केल्यानंतर ते पळून गेले. माहिती कळताच पाळधी दुरक्षेत्राचे पोलिस गावात पोहोचले. याबाबत पाळधी दुरक्षेत्र पोलीस स्टेशनला गुन्हा दाखल केला आहेसंशयित आरोपी योगेश ईश्वर कोळी, आबा ईश्वर कोळी, गणेश सोमा कोळी, मोहन गोविंदा कोळी, कल्पेश महेश पाटील, राहुल भीमराव कोळी, राहुल दिलीप कोळी (सर्व रा. चांदसर, ता. धरणगाव) तसेच गोपाल कोळी, दीपक कोळी (दोन्ही रा. वाकटुकी, ता. धरणगाव) अशी गुन्हा दाखल झालेल्यांची नावे आहेत. कोतवाल अमोल मालचे यांनी दिलेल्या फिर्यादीवरून गुन्हा दाखल करण्यात आला होता.
या प्रकरणी पोलीस अधीक्षक महेश्वर रेड्डी यांनी संशयित आरोपीला ताब्यात घेण्यासाठी आदेश दिल्यानंतर वरिष्ठ पोलीस निरीक्षक बबन आव्हाड यांच्या नेतृत्वाखालील पथकाने ही कारवाई केली. गोपनीय माहितीच्या आधारे, धरणगाव तालुक्यातील पिंप्री खुर्द येथे आठवडे बाजारात संशयित फिरत असल्याचे कळताच पथकाने सापळा रचला व ताब्यात घेतले.चौकशीदरम्यान संशयिताने गुन्ह्याची कबुली दिली. त्याच्याकडून गावठी कटटा, मॅगझीनसह २५,००० रुपयांचा मुद्देमाल हस्तगत करण्यात आला आहे. सदर संशयित आरोपीला पुढील तपासासाठी धरणगाव पोलीस स्टेशनच्या ताब्यात देण्यात आले आहे.
