जळगाव समाचार डेस्क | २५ सप्टेंबर २०२४
अमेरिकेपासून भारतापर्यंत सोन्याच्या किमतीत वेगाने वाढ होत आहे. मल्टी कमोडिटी एक्स्चेंज (MCX) वर सोन्याचा भाव प्रथमच 76,000 रुपयांवर पोहोचला आहे. विशेष म्हणजे, गेल्या 5 दिवसांत सोन्याच्या दरात तब्बल 2,900 रुपयांची वाढ झाली आहे. यूएस सेंट्रल बँक फेड रिझर्व्हने आपल्या व्याजदरात 50 बेसिस पॉइंट्सने कपात केल्यापासून परदेशी बाजारपेठेत सोन्याच्या किमतीत सातत्याने वाढ होत आहे.
5 दिवसांत 2,900 रुपयांची वाढ
मल्टी कमोडिटी एक्स्चेंजमध्ये गेल्या काही दिवसांत सोन्याच्या किमतीत मोठ्या प्रमाणात वाढ दिसून येत आहे. 18 सप्टेंबर रोजी सोन्याचा भाव 73,055 रुपये होता, जो बुधवारी 76,000 रुपयांवर पोहोचला. तज्ज्ञांच्या मते, भू-राजकीय तणाव आणि व्याजदर कपातीमुळे सोन्याच्या किमतीत वाढ होत आहे. यामुळे गुंतवणूकदारांनी मोठा नफा मिळवला आहे.
सोन्याने 76 हजार रुपयांवर नवा विक्रम
गेल्या 70 दिवसांनंतर सोन्याच्या किमतीने MCX वर नवा विक्रम केला आहे. याआधी 17 जुलै रोजी सोन्याने उच्चांक गाठला होता. तज्ज्ञांनी दिलेल्या माहितीनुसार, फेडने व्याजदर कपात केल्याने सोन्याच्या किमतीला चालना मिळाली आहे, तर मध्यपूर्वेतील तणावामुळे देखील सोन्याला आधार मिळत आहे.
सोन्याचे दर 80 हजार रुपयांपर्यंत जाण्याची शक्यता
तज्ज्ञांच्या मते, वर्षअखेर सोन्याचा भाव 80,000 रुपयांपर्यंत पोहोचण्याची शक्यता आहे. चांदीच्या किमतीतही मोठी वाढ झाली असून प्रतिकिलो चांदीचा दर 90,000 रुपयांच्या पातळीवर आला आहे. या वाढत्या किमतीमुळे गुंतवणूकदारांसाठी सोनं आणि चांदी दोन्ही आकर्षक ठरत आहेत.
