जळगाव समाचार डेस्क। २७ ऑगस्ट २०२४
भवरलाल ॲण्ड कांताबाई जैन फाऊंडेशन आणि युवाशक्ती फाऊंडेशनतर्फे आयोजित तरूणींचा दहिहंडी महोत्सव आज (दि. २७) शिवतीर्थ मैदानावर सायंकाळी ६ ते ९ वाजेदरम्यान होणार आहे. या महोत्सवात आठ महिला गोविंदा पथकांना दहिहंडी फोडण्याचा मान मिळणार आहे. महिला गोविंदांच्या सहभागातून साहसी खेळांमध्ये महिलांचा सहभाग वाढावा, हा या आयोजनामागील उद्देश आहे.
उत्सवात नुतन मराठा महाविद्यालय, ॲड. एस. ए. बाहेती महाविद्यालय, मूळजी जेठा महाविद्यालय, एन. सी. सी., के. सी. ई. मुलींचे वसतीगृह, जी. एच. रायसोनी पब्लिक स्कूल, किड्स गुरूकूल इंटरनॅशनल शाळा, जी. एच. रायसोनी महाविद्यालय, एकलव्य क्रीडा संकुल अशा एकूण आठ महिलांच्या गोविंदा पथकांचा सहभाग असून, एकूण ४२३ तरुणी यामध्ये सहभागी होतील.
यासह ढोल-ताशा पथकाचे तब्बल ३११ वादकांचे वादन, तसेच प्रशिक्षक नरेंद्र भोई यांच्या मार्गदर्शनात २७ मुलींची रोपमल्लखांब आणि मल्लखांबाची चित्तथरारक प्रात्यक्षिके सादर केली जातील. याशिवाय लेझर शो, आधुनिक लाईट शो, आणि ५ ते १२ वयोगटातील विद्यार्थ्यांसाठी श्रीकृष्ण-राधा वेशभूषा स्पर्धा होणार आहे.
याप्रसंगी खासदार स्मिता वाघ, आमदार सुरेश भोळे, जिल्हाधिकारी आयुष प्रसाद, पोलीस अधीक्षक डॉ. महेश्वर रेड्डी, मनपा आयुक्त ज्ञानेश्वर ढेरे, जैन इरिगेशनचे अध्यक्ष अशोक जैन आदी मान्यवर उपस्थित राहतील. ज्येष्ठ नागरिक, महिला आणि बालगोपालांसाठी विशेष बसण्याची व्यवस्था करण्यात आली आहे. जळगावकरांनी मोठ्या संख्येने उपस्थित राहावे, असे आवाहन युवाशक्ती फाऊंडेशनतर्फे विराज कावडीया यांनी केले आहे.
