जळगाव समाचार | २१ ऑगस्ट २०२५
जगभरातील प्रेक्षकांच्या मनावर राज्य करणारे आणि “दयाळू न्यायाधीश” म्हणून ओळखले जाणारे अमेरिकन न्यायाधीश फ्रँक कॅप्रियो यांचे ८८ व्या वर्षी निधन झाले. ते गेल्या काही महिन्यांपासून कर्करोगाशी झुंज देत होते. त्यांच्या निधनाची अधिकृत घोषणा त्यांच्या इंस्टाग्राम अकाउंटवर करण्यात आली.
कॅप्रियो हे केवळ कायद्याच्या आधारेच नव्हे, तर करुणा, दया आणि माणुसकीच्या भावनेतून दिलेल्या निर्णयांसाठी जगभरात लोकप्रिय झाले होते. त्यांच्या अनोख्या न्यायशैलीमुळे ते अमेरिकेतच नव्हे तर जगभरातील सर्वाधिक आवडते न्यायाधीश ठरले.
इंस्टाग्रामवर शेअर केलेल्या निवेदनात म्हटले आहे की, “फ्रँक कॅप्रियो यांनी कर्करोगाविरुद्धच्या दीर्घ लढ्यानंतर अखेरचा श्वास घेतला. त्यांची करुणा, नम्रता आणि लोकांवरील अटळ विश्वासामुळे ते सर्वांचेच प्रिय होते. त्यांच्या कामातून लाखो लोकांवर सकारात्मक प्रभाव पडला.”
निवेदनात पुढे नमूद करण्यात आले की, “त्यांनी न्यायाधीश म्हणूनच नव्हे तर पती, वडील, आजोबा, पणजोबा आणि खरे मित्र म्हणूनही सर्वांच्या मनात कायमस्वरूपी स्थान मिळवले. त्यांच्या सन्मानार्थ, आपण जगात अधिक करुणा आणण्याचा प्रयत्न करूया, जसे ते नेहमी करत होते.”
फ्रँक कॅप्रियो यांनी १९८५ मध्ये न्यायाधीश म्हणून कारकीर्द सुरू केली आणि २०२३ मध्ये ते निवृत्त झाले. डिसेंबर २०२३ मध्ये त्यांना कर्करोगाचे निदान झाले होते.
विशेष म्हणजे, निधनाच्या अवघ्या २४ तास आधी त्यांनी सोशल मीडियावर एक पोस्ट शेअर केली होती. रुग्णालयात उपचार घेत असताना त्यांनी लोकांच्या प्रार्थना, प्रेम आणि समर्थनाबद्दल कृतज्ञता व्यक्त केली होती.
दयाळूपणा, विनोदबुद्धी आणि न्यायप्रेम यामुळे कॅप्रियो यांनी असंख्य लोकांच्या हृदयात कायमस्वरूपी स्थान मिळवले. त्यांचे नाव घेताच आजही “दयाळू न्यायाधीश” हीच प्रतिमा डोळ्यांसमोर उभी राहते.
