जळगाव समाचार | १५ मे २०२५
शहरातील दूध फेडरेशन रोडवर मध्यरात्री २ वाजता चारचाकी गाडीमध्ये गोळीबार झाला. यात नाजीम फिरोज पटेल (वय २५, रा. पाळधी) हा तरुण गंभीर जखमी झाला असून, सध्या त्याच्यावर जिल्हा रुग्णालयात उपचार सुरू आहेत.
नाजीम आपल्या मामा आणि मित्रांसोबत भुसावळ येथे कार्यक्रमासाठी गेला होता. रात्री ११ वाजता कार्यक्रम संपल्यानंतर ते पाळधीला परत येत होते. गाडी चालवत असताना छत्रपती शिवाजी महाराज नगरमार्गे जाताना अचानक गोळीबार झाला आणि नाजीमच्या पाठीत गोळी लागली.
पुढील तपासात असं समोर आलं की, गाडीतील त्याचा मित्र तोहीत देशपांडे बंदूक हातात घेऊन खेळत होता. यावेळी गोळी सुटून नाजीम जखमी झाला.
घटनेनंतर नाजीमला तातडीने रुग्णालयात दाखल करण्यात आले. जळगाव शहर पोलिसांनी घटनास्थळी पोहोचून कारवाई केली असून, या प्रकरणी गुन्हा दाखल करून तपास सुरू केला आहे.
