जळगाव समाचार डेस्क | १५ ऑक्टोबर २०२४
जळगाव जिल्ह्यात बनावट नोटांचा मोठा गोरखधंदा उघडकीस आला असून, पोलिसांनी याप्रकरणी आणखी दोघांना अटक केली आहे. या कारवाईत जामनेर येथील नरजील नासीर खान (वय ३०, रा. मदनीनगर घरकुल) आणि गनी मजीद शेख (वय ४७, रा. तोंडापूर, ता. जामनेर) यांना अटक करण्यात आली असून, त्यांच्या ताब्यातून १३,५०० रुपयांच्या २७ बनावट नोटा जप्त करण्यात आल्या आहेत.
मिळालेल्या माहितीनुसार, यापूर्वी यावल येथील चेतन सावकारे आणि नईम शेख या दोघांना अटक करण्यात आली होती. त्यांच्या चौकशीतून नरजील आणि गनी यांचा बनावट नोटा प्रकरणात सहभाग असल्याचे स्पष्ट झाले. अटक झालेल्या नरजीलने पोलिसांना कबुली दिली की, त्याने दोन महिन्यांपूर्वी बऱ्हाणपूर येथून हकीम मोहम्मद अमीन आणि जुबेर असरफ अन्सारी यांच्याकडून बनावट नोटा घेतल्या होत्या. पोलिसांनी हकीम आणि जुबेरचा शोध घेतला असता, हकीम हा दुसऱ्या एका गुन्ह्यात खंडवा कारागृहात असून जुबेर सध्या बेपत्ता आहे.
चौघांना १६ ऑक्टोबरपर्यंत पोलिस कोठडी
सोमवारी सहायक पोलिस निरीक्षक मीरा देशमुख यांनी अटक झालेल्या चौघांना न्यायालयात हजर केले. न्यायालयात सुनावणीदरम्यान पोलिसांनी हकीमचा कारागृहातून ताबा घेणे आणि जुबेरचा शोध घेण्यासाठी संशयितांची वाढीव पोलिस कोठडीची मागणी केली. न्यायाधीश एम. एम. बढे यांनी ही मागणी मान्य करत चौघांना १६ ऑक्टोबरपर्यंत पोलिस कोठडी सुनावली. सरकारतर्फे अॅड. अविनाश पाटील यांनी हे प्रकरण हाताळले.
या बनावट नोटा प्रकरणामुळे जिल्ह्यात खळबळ माजली असून, पोलिसांचा तपास मध्य प्रदेशापर्यंत पोहोचला आहे. पोलिसांनी या गोरखधंद्याचे धागेदोरे शोधून काढत संबंधितांवर कारवाईचा बडगा उगारला आहे.
