जळगाव समाचार डेस्क | २३ सप्टेंबर २०२४
फैजपूर शहर हे ऐतिहासिक वारसासाठी प्रसिद्ध असले तरी, सध्या एका धक्कादायक घटनेमुळे चर्चेत आले आहे. येथे आश्रम शाळेतील विद्यार्थ्यांना शाळेतून घरी नेण्यासाठी शाळेचे अधिकृत वाहन नसून त्याऐवजी विद्यार्थ्यांना ट्रॅक्टरमधून प्रवास करावा लागत असल्याचे उघड झाले आहे. हा प्रकार अत्यंत निंदनीय ठरला असून, विद्यार्थ्यांच्या सुरक्षिततेसाठी मोठा धोका निर्माण झाला आहे.
आश्रम शाळा ते विद्यार्थ्यांचे घरी जाण्याचे अंतर सुमारे सहा किलोमीटर आहे. अशा लांब अंतराच्या प्रवासासाठी सुरक्षित वाहनाची आवश्यकता असताना, विद्यार्थ्यांना ट्रॅक्टरमध्ये बसवून पाठवले जात आहे. या सहा किलोमीटरच्या प्रवासात एखादा विद्यार्थी ट्रॅक्टरमधून पडला असता, तर मोठी जीवितहानी होण्याची शक्यता होती.
या प्रकारानंतर सोशल मीडियावर या घटनेची तीव्र प्रतिक्रिया उमटली असून, संबंधित आश्रम शाळेची चौकशी करून शाळा व्यवस्थापकांवर कारवाई करण्याची मागणी होत आहे. शिक्षण विभागाने तत्काळ या घटनेची चौकशी करावी, तसेच संबंधित शाळेची मान्यता रद्द करण्याची मागणी सोशल मीडियाच्या माध्यमातून केली जात आहे.
विद्यार्थ्यांच्या सुरक्षिततेचा प्रश्न गंभीर बनत असल्याने शिक्षण विभागाने या प्रकरणाची सखोल चौकशी करून योग्य ती कारवाई करण्याची मागणी जोर धरत आहे.
