जळगाव समाचार | ३० जानेवारी २०२६
उपमुख्यमंत्री अजित पवार यांच्या विमान अपघातातील अकाली निधनानंतर महाराष्ट्राच्या राजकारणात मोठी पोकळी निर्माण झाली असून, त्या पार्श्वभूमीवर राष्ट्रवादी काँग्रेसमध्ये नव्या नेतृत्वाचा शोध वेगाने सुरू आहे. या पार्श्वभूमीवर अजित पवार यांच्या पत्नी व राज्यसभा खासदार सुनेत्रा पवार यांचे नाव पुढे येत आहे. राष्ट्रवादी काँग्रेसचे ज्येष्ठ नेते छगन भुजबळ यांनी दिलेल्या संकेतांनुसार, शनिवारी (३१ जानेवारी २०२६) सुनेत्रा पवार उपमुख्यमंत्रीपदाची शपथ घेण्याची शक्यता वर्तवली जात आहे. हे प्रत्यक्षात घडल्यास महाराष्ट्राला पहिली महिला उपमुख्यमंत्री मिळण्याचा ऐतिहासिक क्षण ठरेल.
सुनेत्रा अजित पवार यांचा जन्म १८ ऑक्टोबर १९६३ रोजी झाला. त्यांची कौटुंबिक पार्श्वभूमी राजकीयदृष्ट्या सशक्त असून, त्यांचे बंधू पद्मसिंह पाटील हे राज्याचे माजी मंत्री व लोकसभा खासदार राहिले आहेत. सक्रिय राजकारणात येण्यापूर्वी सुनेत्रा पवार यांनी सामाजिक व पर्यावरणीय क्षेत्रात भरीव कार्य केले आहे. ‘एन्व्हायर्नमेंटल फोरम ऑफ इंडिया’ या संस्थेच्या माध्यमातून त्यांनी सेंद्रिय शेती, पर्यावरण संवर्धन आणि ग्रामीण भागातील शाश्वत विकासासाठी योगदान दिले आहे. याशिवाय बारामतीतील विविध शैक्षणिक व सामाजिक संस्थांच्या प्रशासकीय जबाबदाऱ्याही त्यांनी समर्थपणे सांभाळल्या आहेत.
राजकारणातील त्यांचा थेट प्रवेश अलीकडचा असला, तरी प्रभाव लक्षणीय राहिला आहे. २०२४ च्या लोकसभा निवडणुकीत त्यांनी बारामती मतदारसंघातून निवडणूक लढवून राज्याचे लक्ष वेधून घेतले. त्या निवडणुकीत यश न मिळाल्यानंतरही पक्ष नेतृत्वाने त्यांच्यावर विश्वास दाखवत राज्यसभेवर बिनविरोध निवड केली. प्रफुल्ल पटेल यांच्या राजीनाम्यानंतर रिक्त झालेल्या जागेवर त्या राज्यसभा खासदार झाल्या आणि संसदेमधील कामकाजातून त्यांनी आपली स्वतंत्र ओळख निर्माण केली.
अजित पवार यांच्या निधनानंतर पक्ष व सरकारमध्ये निर्माण झालेली नेतृत्वाची पोकळी भरून काढण्याचे मोठे आव्हान सुनेत्रा पवारांसमोर असणार आहे. उपमुख्यमंत्रीपदाची जबाबदारी त्यांच्यावर सोपवली गेल्यास, केवळ एका मतदारसंघापुरते नव्हे तर संपूर्ण राज्याचे नेतृत्व त्यांना सांभाळावे लागणार आहे. कौटुंबिक राजकीय वारसा, सामाजिक कार्याची पार्श्वभूमी आणि राज्यसभेतील अनुभव यांच्या बळावर त्या या भूमिकेत कितपत प्रभावी ठरतात, याकडे राज्याचे लक्ष लागले आहे.
