जळगाव समाचार | २७ एप्रिल २०२५
“चोपडा शहरातून धक्कादायक घटना समोर आली आहे! शहरातील आंबेडकर नगर, म्हणजेच खाई वाडा परिसरात, शनिवारी रात्री उशीरा, प्रेमविवाहाच्या रागातून सेवानिवृत्त सीआरपीएफ अधिकाऱ्याने आपल्या मुलीवर आणि जावयावर गोळीबार केला. या गोळीबारात मुलगी तृप्ती अविनाश वाघ, वय २४, हिचा जागीच मृत्यू झाला. तर जावई अविनाश ईश्वर वाघ, वय २८, गंभीर जखमी झाले आहेत. या घटनेमुळे संपूर्ण चोपडा शहरात एकच खळबळ माजली आहे.
दोन वर्षांपूर्वी तृप्ती आणि अविनाश यांनी प्रेमविवाह केला होता. मात्र वडील किरण अर्जुन मंगले, वय ४८, यांना हा विवाह मान्य नव्हता. राग मनात ठेवत, त्यांनी चक्क आपल्या जावयाच्या बहिणीच्या हळदीच्या कार्यक्रमात, लोकांच्या गर्दीत गोळीबार केला.
प्रथम त्यांनी आपल्या मुलीवर गोळी झाडली, ज्यात तृप्तीचा जागीच मृत्यू झाला. त्यानंतर जावई अविनाशवर गोळी झाडली, ज्यात तो गंभीर जखमी झाला आहे.
घटनेनंतर संतप्त जमावाने आरोपी वडिलांना चांगलाच चोप दिला. यात किरण मंगले स्वतःही गंभीर जखमी झाले. दोघांनाही तातडीने चोपडा उपजिल्हा रुग्णालयात दाखल करण्यात आले आणि पुढील उपचारासाठी जळगाव येथे हलवण्यात आले आहे.
या घटनेची माहिती मिळताच, पोलीस उपविभागीय अधिकारी अण्णासाहेब घोलप, पोलिस निरीक्षक मधुकर साळवे आणि उपनिरीक्षक जितेंद्र वल्टे यांनी घटनास्थळी धाव घेतली. सध्या या प्रकरणाची सखोल चौकशी सुरू आहे. या घटनेमुळे चोपडा शहरात भीतीचे आणि अस्वस्थतेचे वातावरण पसरले आहे.
