जळगाव समाचार | ३ मे २०२५
चाळीसगाव शहर पोलिसांनी मालेगाव रोडवरील धुळे–छत्रपती संभाजीनगर बायपास चौफुली येथे वाहन तपासणी दरम्यान २४ लाख ६९ हजार १५० रुपये किमतीचा ४२ किलो ५८३ ग्रॅम गांजा जप्त केला आहे.
या बाबत सविस्तर वृत्त असे की, चाळीसगाव शहर पोलिसांनी ३० एप्रिल रोजी पहाटेच्या सुमारास नाकाबंदी दरम्यान पांढऱ्या रंगाच्या मारुती स्विफ्ट डिझायर (MH 12 KN 2305) या वाहनाची तपासणी केली असता, वाहनाच्या डिकीत निळ्या रंगाच्या चार प्लास्टिक पिशव्यांमध्ये गांजा आढळून आला. या प्रकरणी शेख नदीम शेख बशीर (वय ४०, रा. गुलवानी खालदा, गल्ली क्र. ३, मालेगाव, जि. नाशिक) याला घटनास्थळीच अटक करण्यात आली. आरोपीविरुद्ध एनडीपीएस (NDPS) कायद्यान्वये गुन्हा दाखल करण्यात आला असून तस्करीसाठी वापरलेली कार देखील पोलिसांनी जप्त केली आहे.
तपासादरम्यान पोलीस निरीक्षक किरणकुमार कबाडी यांना मिळालेल्या माहितीनुसार, कन्नड शहर पोलीस ठाण्याच्या हद्दीतही गांजा साठवून ठेवण्यात आल्याचे समोर आले. या माहितीच्या आधारे कन्नड पोलिसांनी छापा टाकत सुमारे ४५० किलो गांजा जप्त केला आहे.
ही संपूर्ण कारवाई पोलीस अधीक्षक डॉ. महेश्वर रेड्डी, अपर पोलीस अधीक्षक कविता नेरकर आणि उपविभागीय पोलीस अधिकारी राजेंद्रसिंह चंदेल यांच्या मार्गदर्शनाखाली पार पडली. या मोहिमेमध्ये पोलीस निरीक्षक किरणकुमार कबाडी, पोलीस उपनिरीक्षक संदीप घुले, योगेश माळी, कैलास पाटील, अरुण बाविस्कर तसेच पोलीस कर्मचारी राहुल सोनवणे, विनोद पाटील, योगेश बेलदार, अजय पाटील, भूषण पाटील, राकेश पाटील, नितीन आगवणे आणि महेंद्र पाटील यांनी सहभाग घेतला.
अटक करण्यात आलेल्या आरोपीला न्यायालयात हजर करण्यात आले असता, न्यायालयाने त्याला शनिवार, ३ मे २०२५ पर्यंत पोलिस कोठडीत ठेवण्याचा आदेश दिला असून पुढील तपास सुरू आहे.
