जळगाव समाचार डेस्क | २७ जानेवारी २०२५
स्पोर्ट्स डेच्या स्पर्धेत भाग घेतलेल्या १२ वर्षीय विद्यार्थ्याचा हृदयविकाराच्या झटक्याने मृत्यू झाल्याची धक्कादायक घटना इंदौरमधील एका शाळेत घडली आहे. सुब्रत असे या विद्यार्थ्याचे नाव असून, धावण्याच्या स्पर्धेत धावताना तो मैदानातच कोसळला. शाळेच्या शिक्षकांनी त्याला तातडीने रुग्णालयात दाखल केले, परंतु उपचार सुरू होण्यापूर्वीच त्याचा मृत्यू झाला.
शाळेत स्पोर्ट्स डे निमित्त धावण्याच्या स्पर्धेचे आयोजन करण्यात आले होते. या स्पर्धेदरम्यान सुब्रत धावत असताना अचानक कोसळला. धावण्यामुळे त्याला श्वास घेण्यास त्रास होऊ लागला आणि तो जमिनीवर पडला. मैदानावरील शिक्षक व विद्यार्थ्यांनी त्याला उचलून रुग्णालयात नेले, मात्र डॉक्टरांनी त्याला मृत घोषित केले.
पोलिसांच्या प्राथमिक तपासानुसार, सुब्रतचा मृत्यू कार्डियाक अरेस्टमुळे झाला आहे. सुब्रतला पूर्वीपासून हृदयविकाराचा त्रास असण्याची शक्यता वर्तवण्यात येत आहे. घटनेनंतर कुटुंबीयांनी शवविच्छेदन करण्यास नकार दिला आहे.
सुब्रत मूळचा देवासचा रहिवासी होता. सध्या लसूडिया पोलीस ठाण्याच्या हद्दीत असलेल्या शाळेत तो शिकत होता. या दुर्दैवी घटनेनंतर शाळेने स्पोर्ट्स डेचे सर्व कार्यक्रम रद्द केले असून संपूर्ण परिसरात शोककळा पसरली आहे.
अतिरिक्त पोलीस उपअधीक्षक राजेश दंतोडिया यांनी सांगितले की, मृतदेह शवविच्छेदनासाठी पाठवण्याची तयारी केली होती, मात्र कुटुंबीयांच्या विनंतीनुसार तो परत करण्यात आला आहे. या प्रकरणाचा अधिक तपास सुरू आहे.
या घटनेमुळे सुब्रतच्या कुटुंबीयांवर दु:खाचा डोंगर कोसळला असून, शाळेतील विद्यार्थी व शिक्षक देखील शोकमग्न झाले आहेत.
