जळगाव समाचार डेस्क | ६ फेब्रुवारी २०२५
जळगाव जिल्ह्यात वाढत्या मोटारसायकल चोरीच्या घटनांवर नियंत्रण मिळवण्यासाठी पोलिसांनी मोठी कारवाई केली आहे. पोलिस अधीक्षक महेश्वर रेड्डी आणि अपर पोलिस अधीक्षक अशोक नखाते यांच्या मार्गदर्शनाखाली पोलिसांनी विशेष मोहिम राबवली. या मोहिमेअंतर्गत उपविभागीय पोलिस अधिकारी संदीप गावीत यांच्या नेतृत्वाखाली एम.आय.डी.सी. पोलिस ठाण्याच्या गुन्हे शोध पथकाने मोठी कामगिरी केली आहे.
जळगाव शहरात पोलिसांना गुप्त बातमीदारामार्फत माहिती मिळाली की, एम.आय.डी.सी. पोलीस स्टेशनच्या हद्दीत एक व्यक्ती चोरीच्या मोटारसायकलसह फिरत आहे. या माहितीनंतर पोलिस निरीक्षक संदीप पाटील यांच्या मार्गदर्शनाखाली उपनिरीक्षक राहुल तायडे, चंद्रकांत धनके आणि पोलिस कर्मचारी प्रदीप चौधरी, विकास सातदिवे, रतन गिते, राहुल घेटे, योगेश बारी आणि योगेश घुगे यांच्या पथकाने तत्काळ कारवाई करत आरोपीला ताब्यात घेतले.
तपासादरम्यान आरोपीने आपले नाव विक्की नंदलाल भालेराव (वय २८, रा. वाघ नगर, जळगाव) असे सांगितले. त्याने बहिणाबाई उत्सवाच्या दरम्यान सागर पार्क परिसरातून एक मोटारसायकल चोरल्याचे कबूल केले. पोलिसांनी अधिक चौकशी केली असता आरोपीने जळगाव आणि धुळे जिल्ह्यातून एकूण १५ मोटारसायकली चोरी केल्याचे मान्य केले, ज्यांची एकूण किंमत ₹७,५०,०००/- इतकी आहे.
या तपासादरम्यान एकूण ९ मोटारसायकल चोरीचे गुन्हे उघडकीस आले आहेत. हे गुन्हे खालील पोलिस ठाण्यांत नोंद आहेत –
• एम.आय.डी.सी. पोलिस स्टेशन – २ गुन्हे
• जिल्हा पेठ पोलिस स्टेशन – ३ गुन्हे
• रामानंद नगर पोलिस स्टेशन – ३ गुन्हे
• मोहाडी पोलिस स्टेशन, धुळे – १ गुन्हा
पोलिसांनी आरोपीला अटक करून न्यायालयीन कोठडी मिळवली आहे. पोलीस उपनिरीक्षक चंद्रकांत धनके, पोना विकास सातदिवे, पोना प्रदीप चौधरी, आणि पोकों रतन गिते हे पुढील तपास करत आहेत. आणखी चोरी केलेल्या गाड्यांची माहिती मिळवण्यासाठी तपास सुरू आहे.
ही यशस्वी कारवाई पोलीस अधीक्षक महेश्वर रेड्डी, अपर पोलीस अधीक्षक अशोक नखाते आणि उपविभागीय पोलिस अधिकारी संदिप गावीत यांच्या मार्गदर्शनाखाली करण्यात आली आहे. जळगाव पोलिसांच्या या तडाखेबंद कारवाईमुळे शहरात चोरीच्या घटनांना आळा बसण्याची शक्यता आहे.
