जळगाव समाचार | ९ नोव्हेंबर २०२५
नंदूरबार जिल्ह्यातील देवगुई घाट परिसरात रविवारी भीषण अपघात झाल्याची घटना समोर आली आहे. जळगाव जिल्ह्यातील चाळीसगाव तालुक्यातील मेहूणबारे अनुदानित आश्रमशाळेच्या विद्यार्थ्यांना घेऊन जाणारी बस ८० ते १०० फुट दरीत कोसळल्याने दोन विद्यार्थ्यांचा जागीच मृत्यू झाला असून ५० पेक्षा अधिक विद्यार्थी जखमी झाल्याचे वृत्त हाती आले आहे. दिवाळी सुटीनंतर आश्रमशाळेत परतण्यासाठी ही बस मोलगी परिसरातून अक्कलकुव्याकडे येत असताना चालकाचे नियंत्रण सुटल्याने दुर्घटना घडल्याचे प्राथमिक माहितीवरून स्पष्ट झाले. बसमध्ये मुलींसह लहान बालकांचाही समावेश होता.
अपघातानंतर स्थानिकांनी धाडसाने दरीत उतरून बचावकार्य सुरु केले दरम्यान जखमींना अक्कलकुवा ग्रामीण रुग्णालयात दाखल करण्यात आले असून दोन ते तीन विद्यार्थ्यांची प्रकृती गंभीर असल्याचे सांगितले जात आहे. घटनास्थळी पोलीस व स्थानिक प्रशासन तातडीने दाखल झाले. मात्र अद्याप अधिकृत आकडेवारी जाहीर करण्यात आलेली नाही.
