जळगाव समाचार | १८ मार्च २०२५
बसमध्ये प्रवास करत असताना महिलेच्या पर्समधून सोन्याचे दागिने चोरीला गेल्याची घटना ६ मार्च रोजी घडली होती. अमळनेर पोलिसांनी या प्रकरणी तपास करून आठवडाभराच्या शोधमोहीमेनंतर दोन महिलांना अटक केली आहे. त्यांच्याकडून चोरी गेलेले सोन्याचे दागिने जप्त करण्यात आले आहेत.
याबाबत सविस्तर वृत्त असे की, प्रतिभा पाटील (वय ४८, रा. गारखेडे, ता. धरणगाव) या ६ मार्च रोजी जळगाव-दोंडाईचा बसने वाघोदे येथे नातेवाईकांच्या लग्नासाठी जात होत्या. प्रवासादरम्यान त्यांच्या पर्समध्ये दोन सोन्याच्या बांगड्या आणि मंगळसूत्र ठेवले होते. यावेळी बसमध्ये त्यांच्याजवळ दोन अनोळखी महिला बसल्या होत्या. अमळनेरच्या चोपडा नाका स्टॉपवर त्या महिला उतरल्या. काही वेळाने प्रतिभा पाटील यांनी पर्स तपासली असता सोन्याचे दागिने चोरीला गेल्याचे लक्षात आले. त्यांनी लगेच अमळनेर पोलीस ठाण्यात तक्रार दाखल केली.
या प्रकरणी पोलिस अधीक्षक महेश्वर रेड्डी, अपर पोलिस अधीक्षक कविता नेरकर, उपविभागीय पोलिस अधिकारी विनायक कोते आणि परी पोलीस उप-अधीक्षक केदार बारबोले यांच्या मार्गदर्शनाखाली विशेष तपास पथक तयार करण्यात आले.
तपासादरम्यान चोरी करणाऱ्या महिलांनी सतत आपले ठिकाण बदलत असल्याचे आढळले. त्या जळगाव, अकोला, बार्शी टाकळी, परतवाडा आणि मध्य प्रदेशातील इंदूर येथे लपून राहत होत्या. पोलिसांनी सातत्याने पाठलाग करून अखेर वरुड (जि. अमरावती) येथे आठवडी बाजार भागात त्यांना अटक केली.
अटक करण्यात आलेल्या महिला या यवतमाळ येथील रहिवासी असल्याचे समोर आले. गंगा चैना हातगळे (वय ४०, रा. नेताजी नगर, यवतमाळ), गंगा सुभाष नाडे (वय ४५, रा. नेताजी नगर, यवतमाळ) असे यांचे नाव असून, या दोघींनी गुन्ह्याची कबुली दिली असून पोलिसांनी त्यांच्या ताब्यातून चोरी गेलेले दागिने हस्तगत केले आहेत.
