जळगाव समाचार | १२ डिसेंबर २०२५
धुळे–जळगाव महामार्गावरील फागणे गावाजवळ गुरुवारी सायंकाळी झालेल्या भीषण अपघातात जळगाव येथील दोन दुचाकीस्वारांचा जागीच मृत्यू झाला. दीपक मोतीलाल भामरे (45) व पन्नालाल भगवान वर्मा (दोन्ही रा. जळगाव) हे एमएच 19 सीई 1719 क्रमांकाच्या दुचाकीवरून धुळ्याकडून जळगावच्या दिशेने जात असताना, अज्ञात वाहनाने भरधाव वेगात येत त्यांच्या दुचाकीस जोरदार धडक दिली. धडकेची तीव्रता इतकी भीषण होती की दोघेही रस्त्यावर फेकले जाऊन जागीच प्राणांतिक जखमी झाले.
अपघाताची माहिती मिळताच धुळे तालुका पोलिसांनी तातडीने घटनास्थळी धाव घेत पंचनामा केला. दोन्ही मृतदेह भाऊसाहेब हिरे वैद्यकीय महाविद्यालयात शवविच्छेदनासाठी हलविण्यात आले. दरम्यान, अज्ञात वाहनचालकाविरुद्ध गुन्हा दाखल करण्यात आला असून पोलिसांकडून पुढील तपास सुरू आहे.
