विक्रम लालवाणी, पारोळ प्रतिनिधी
शेतजमिनीच्या सातबारा उताऱ्यावर कर्जाचा बोजा चढविण्याच्या मोबदल्यात १ हजार रुपयांची लाच मागितल्याप्रकरणी पारोळा तालुक्यात तलाठीसह एका खाजगी इसमाला अटक करण्यात आली आहे. लाचलुचपत प्रतिबंधक विभागाच्या पथकाने ही कारवाई केली असून, दोघांवर गुन्हा दाखल करण्यात आला आहे.
या संदर्भात मिळालेली अधिक माहिती अशी की, लोणी बु. गावातील ३९ वर्षीय तक्रारदार यांची आणि त्यांच्या कुटुंबियांची साडे सहा एकर शेतजमीन आहे. कर्ज घेण्यासाठी या जमिनीच्या सातबारा उताऱ्यावर कर्जाचा बोजा चढवणे आवश्यक होते. तक्रारदाराने यासाठी लोणी बु. गावाचे तलाठी सुभाष विठ्ठल वाघमारे (वय ३४, रा. वर्धमान नगर, पारोळा) यांच्याकडे संपर्क साधला.
तलाठ्याने तक्रारदाराकडे ४ उताऱ्यांकरिता प्रत्येकी २०० रुपयांप्रमाणे ८०० रुपये आणि मागील कामाचे २०० रुपये, असा एकूण १००० रुपयांची लाच मागितली. या लाच मागणीसाठी खाजगी इसम शरद प्रल्हाद कोळी (वय ४३, रा. चोरवड, पारोळा) याने मध्यस्थी केली. त्यांनी तक्रारदाराला लाच रक्कम फोन पे अकाउंटवर पाठविण्यास सांगितले.
तक्रारदाराने ही बाब लाचलुचपत प्रतिबंधक विभागाकडे तक्रार म्हणून नोंदवली. त्यानुसार, पोलिस उपअधीक्षक योगेश ठाकूर यांच्या मार्गदर्शनाखाली पोलीस निरीक्षक नेत्रा जाधव आणि त्यांच्या पथकाने या प्रकरणी कारवाई केली. तलाठी सुभाष वाघमारे आणि शरद कोळी या दोघांनाही अटक करण्यात आली असून, पारोळा पोलीस स्टेशनमध्ये गुन्हा दाखल करण्यात आला आहे.
सदर कारवाईत पोलीस निरीक्षक स्मिता नवघरे, पोहेको शैला धनगर, पोलीस कॉन्स्टेबल प्रदीप पोळ, पीएसआय दिनेशसिंग पाटील, पोहेका रविंद्र घुगे, सुनिल वानखेडे, पोना बाळू मराठे, किशोर महाजन, पोकॉ प्रणेश ठाकुर, अमोल सुर्यवंशी यांनी सहभाग घेतला.
