जळगाव समाचार | १६ मार्च २०२६
अनैतिक संबंधांच्या संशयातून जळगाव जिल्ह्यातील एका युवकाचा खून करून त्याचा मृतदेह धुळे जिल्ह्यातील दोंडाईचा परिसरात नेऊन जाळल्याची धक्कादायक घटना उघडकीस आली आहे. या प्रकरणी जळगाव जिल्ह्यातील पिंपळगाव हरे पोलिस ठाण्यात गुन्हा दाखल करण्यात आला असून पोलिसांनी तपासाची चक्रे वेगाने फिरविली आहेत. जिल्हा पोलीस अधीक्षक श्रीकांत धिवरे यांनी या घटनेची माहिती देत आरोपींचा शोध घेण्यासाठी तपास सुरू असल्याचे सांगितले.
या प्रकरणातील मृत व्यक्तीचे नाव विजय भिमा राठोड असून ते जळगाव जिल्ह्यातील पिंपळगाव हरे तांडा येथील रहिवासी होते. प्राथमिक तपासात संजय परशुराम जाधव (वय ३५, रा. पिंपळगाव हरे तांडा, जि. जळगाव) याच्यावर संशय व्यक्त करण्यात आला आहे. पोलिसांच्या माहितीनुसार संजय जाधव याला मृत विजय राठोड आणि त्याच्या पत्नीमध्ये अनैतिक संबंध असल्याचा संशय होता. या संशयातूनच रागाच्या भरात त्याने विजय राठोड यांचा खून केल्याचा प्राथमिक अंदाज तपास यंत्रणांनी व्यक्त केला आहे. या प्रकरणात संजय जाधव याच्यासह त्याच्या पत्नीवरही संशय व्यक्त करण्यात येत असून दोघांची चौकशी करण्यात येत आहे.
पोलिस तपासातून समोर आलेल्या माहितीनुसार २१ फेब्रुवारी २०२६ रोजी संजय जाधव याने विजय राठोड यांचा खून करून पुरावे नष्ट करण्याच्या उद्देशाने त्यांचा मृतदेह जळगाव जिल्ह्यातून धुळे जिल्ह्यातील दोंडाईचा परिसरात नेला. शिंदखेडा तालुक्यातील अंजनविहिरे गावाजवळील पाटाच्या चारी परिसरात पुलाजवळ असलेल्या पाइपमध्ये मृतदेह टाकून तो जाळण्यात आल्याची माहिती समोर आली आहे. या घटनेनंतर त्या ठिकाणी मोठ्या प्रमाणावर जळालेल्या अवशेषांचा शोध घेण्याचे काम सुरू करण्यात आले आहे.
घटनेची माहिती मिळताच पिंपळगाव हरे पोलिस ठाण्याचे पथक तसेच दोंडाईचा पोलिस घटनास्थळी दाखल झाले. घटनास्थळी जळालेल्या मृतदेहाचे अवशेष, हाडे आणि इतर पुरावे शोधण्याचे काम पोलिसांकडून सुरू करण्यात आले आहे. तपासासाठी धुळे जिल्हा पोलिसांकडून फॉरेन्सिक पथकही घटनास्थळी पाठविण्यात आले असून जळालेल्या अवशेषांची तपासणी करण्यात येत आहे.
मृतदेह पूर्णतः जळालेल्या अवस्थेत आढळल्यामुळे प्रारंभी ओळख पटविणे कठीण झाले असले तरी आवश्यकतेनुसार डीएनए तपासणीद्वारे मृत व्यक्तीची ओळख निश्चित केली जाईल, अशी माहिती पोलिस सूत्रांनी दिली आहे. घटनास्थळाचा पंचनामा करून पोलिसांनी महत्त्वाचे नमुने ताब्यात घेतले असून ते फॉरेन्सिक तपासणीसाठी पाठविण्याची प्रक्रिया सुरू आहे.
या घटनेमुळे जळगाव आणि धुळे जिल्ह्याच्या सीमेवरील परिसरात मोठी खळबळ उडाली आहे. आरोपीने गुन्ह्यानंतर पुरावे नष्ट करण्यासाठी मृतदेह दूरच्या ठिकाणी नेऊन जाळल्याचा संशय पोलिसांनी व्यक्त केला आहे. दरम्यान, संशयित आरोपी आणि त्याच्या पत्नीची सखोल चौकशी करून या खून प्रकरणामागील नेमकी पार्श्वभूमी आणि घटनाक्रम उलगडण्याचा प्रयत्न पोलिसांकडून सुरू आहे. पिंपळगाव हरे पोलिस ठाण्यात या प्रकरणी गुन्हा दाखल करण्यात आला असून आरोपींचा शोध घेण्यासाठी विशेष पथकेही तैनात करण्यात आली आहेत. पुढील तपास सुरू असल्याची माहिती पोलिसांकडून देण्यात आली आहे.
